19 áıelde sút bezi qaterli isigine kúdik anyqtaldy
Ótken senbide Almatyda áıelder arasynda sút bezi qaterli isiginiń aldyn alý maqsatynda aýqymdy aksıa ótti, dep habarlaıdy Almaty-akshamy.kz.
Almaty Qoǵamdyq densaýlyq saqtaý basqarmasynyń málimetinshe, bul kúni qalanyń 17 medısınalyq uıymynda Ashyq esik kúni ótip, onda 839 áıel onko-mammolog mamandardan tegin keńes aldy. Naýqan múmkindiginshe kóp áıeldiń densaýlyǵyn tekserý úshin demalys kúni ótkizildi.
Bul kúni aldyn ala jazylýsyz jáne joldamasyz mammolog mamannyń keńesin alyp, qajetti zertteýlerden – sút bezderiniń últradybystyq jáne mammografıasynan ótýge múmkindik boldy. Júrgizilgen tekserý nátıjesinde 19 áıelde sút bezi qaterli isigine kúdik anyqtaldy. Anyqtalǵan patologıasy bar áıelderge Almaty onkologıalyq ortalyǵynda odan ári tekserý jáne emdeý boıynsha usynystar berildi. Qalalyq onkologıalyq dıspanserdiń bas dárigeri Nursultan İzbaǵambetov bul shara jyl saıyn qazan aıynda álemniń túrli elderinde ótetin Dúnıejúzilik kampanıa – sút bezi obyryna qarsy kúres aılyǵyna oraılastyrylyp otyrǵanyn aıtty.
«Naýqan sút bezi isigin erte anyqtaý, der kezinde emdeýdi bastaý jáne ólim-jitim deńgeıin tómendetý úshin áıelderdi skrınıngten ótkizýge baǵyttalǵan. Qymbatty da aıaýly arýlar, qazannyń 1-inen aıdyń ár senbisinde Ortalyqta sút bezi qaterli isiginiń profılaktıkalyq tekserýleri júrgiziletinin taǵy da eske salǵym keledi. Barlyq áıelderdi tekserýden ótýge shaqyramyz», - dedi ol.
Esterińizge sala keteıik, 30-40 jas aralyǵyndaǵy árbir saý áıel jylyna bir ret sút beziniń últradybystyq zertteýinen ótýi kerek. 40 jastan asqan áıelder 2 jylda bir ret mammografıadan ótýi tıis.
Gınekolog pen mammologqa únemi qaralýmen birge ózin-ózi tekserý erte kezeńde sút bezindegi ózgeristi anyqtaýǵa kómektesedi. Bul óte mańyzdy. Sút bezderin ózin-ózi tekserý júıeli túrde aıyna bir ret etekkir sıkliniń 7-10-shy kúnderinde usynylady. Menopaýza kezinde belgili bir kúnde, mysaly, ár aıdyń birinshi kúni turaqty tekserýden ótý kerek.
Esterińizde bolsyn, erte dıagnostıka ómirińizdi aman saqtap qalady!