Almaty qalalyq kardıologıalyq ortalyǵynda aortanyń qabattanyp jarylýy dıagnozy qoıylǵan pasıentke asa kúrdeli operasıa sátti jasaldy. Bul – kardıohırýrgıadaǵy eń ómirge qaýipti jaǵdaılardyń biri, - dep habarlaıdy aqshamnews.kz.
Pasıent 2020 jyly aortakoronarlyq shýnttaý operasıasyn basynan ótkergen. Arada birneshe jyl ótken soń onyń jaǵdaıy qaıtadan kúrt nasharlap, aortanyń qabattanyp jarylýy paıda boldy, ol aortanyń jyrtylýyna alyp kelgen. Mundaı jaǵdaıda ár mınýt sheshýshi ról atqarady.
Aortanyń jyrtylýy – shuǵyl aralasýdy talap etetin eń aýyr dıagnozdardyń biri. Ekinshiden, bul — buryn shýnttaý jasalǵannan keıingi ashyq júrekke qaıtalama operasıa. Mundaı jaǵdaılarda tinderdiń ózgerýi, jabyspalardyń bolýy ómirlik mańyzdy qurylymdardy ajyratýdy óte qıyndatady.
Kardıohırýrgtar jasandy qanaınalym apparatyn qoldana otyryp, pasıenttiń qanaınalymyn tolyq baqylaýda ustap, shamamen bes saǵat boıy jumys istedi.
Operasıa barysynda mamandar aortanyń zaqymdanǵan bóligin alyp tastap, onyń tutastyǵyn jasandy tamyr protezi arqyly qalpyna keltirdi.
Operasıany: kardıohırýrgtar, kardıologtar, anestezıolog-reanımatologtar, perfýzıologtar jáne operasıalyq meıirgerlerden turatyn mýltıdısıplınalyq komanda júrgizdi.
Komandanyń úılesimdi jumysynyń arqasynda pasıentke sátti opersıa jasaldy.
Qazirgi ýaqytta er adam dárigerlerdiń baqylaýynda, onyń jaǵdaıy turaqty dep baǵalanýda.
«Árbir mundaı operasıa – ómir úshin kúres. Biz jaǵdaı qanshalyqty aýyr kórinse de, pasıentke múmkindik berý úshin zamanaýı kardıohırýrgıanyń barlyq múmkindikterin qoldanamyz», – dedi qalalyq kardıologıalyq ortalyqtyń dırektory Ermaǵambet Qýatbaev.