Almaty qalasynda áleýmettik mańyzy bar azyq-túlik (ÁMAT) baǵasyn turaqtandyrý maqsatynda birqatar sharalar qabyldandy. Qala bıligi otandyq óndirýshilermen kelisimsharttar jasap, maýsymaralyq kezeńde kókónis baǵasyn retteý tetikterin iske qosty. Bul týraly Aqshamnews.kz saıty habarlaıdy.
Almatyda azyq-túlik baǵasyn ustap turý úshin "forvardtyq satyp alý" jáne "aınalym qaryzy" mehanızmderi engizildi. Osy sharalar aıasynda otandyq óndirýshilermen tómendegi kólemde ónim jetkizý jóninde kelisim jasaldy:
- 1 000 tonna kúrish – "Asyl Dan Trade" JSHS
- 1 800 tonna taýyq eti – "Alataý-qus" AQ
- 170 tonna sút – "Kókshetaý Belogore sút zaýyty" JSHS
- 86,4 mln dana jumyrtqa – "Sary-Bulaq" AQ
- 4 500 tonna qant – "Kóksý qant zaýyty" JSHS
- 800 tonna tuz – "Altyn Orda" JSHS
Bul kelisimder belgilengen baǵa boıynsha ónim jetkizýge múmkindik beredi.
Kókónis baǵasyn turaqtandyrý úshin (kartop, sábiz, pıaz, qyryqqabat) Pavlodar, Almaty, Jambyl jáne Túrkistan oblystarynyń sharýalarymen 9 700 tonna ónimdi tómendetilgen baǵamen jetkizý jóninde "forvardtyq" kelisimder jasaldy. Sondaı-aq, Túrkistan, Jambyl jáne Almaty oblystarynan erte pisetin kókónisterdi jetkizý máselesi qosymsha qarastyrylyp jatyr.
Bul sharalar maýsymaralyq kezeńde kókónis baǵasynyń qymbattaýyn boldyrmaýǵa kómektesedi.
Áleýmettik mańyzy bar azyq-túlik taýarlarynyń 11 túri boıynsha Magnum saýda jelisimen baǵa belgileý jóninde kelisim jasaldy. Bul kelisim halyqqa qajetti taýarlardy qoljetimdi baǵamen usynýǵa yqpal etedi.
ÁMAT baǵasyn baqylaý jáne deldaldardyń baǵaǵa áserin azaıtý maqsatynda Óńirlik komısıa turaqty monıtorıń júrgizýde. Saýda núktelerimen 15%-dyq saýda ústemesin saqtaý jáne deldaldyq tizbekti qysqartý jóninde túsindirý jumystary qolǵa alyndy.
Jyl basynan beri:
- 5 ret komısıa otyrysy ótti,
- 119 ereje buzý faktisi anyqtaldy,
- 113 ákimshilik hattama toltyryldy,
- 6 aıyppul salyndy,
- 17 tıimsiz deldal naryqtan shyǵaryldy.
Bul sharalar baǵanyń negizsiz ósýine jol bermeýge baǵyttalǵan.
Qazirgi ýaqytta "aınalym qaryzy" jáne "forvardtyq" kelisim aıasynda qosymsha kelisimsharttar jasaý máselesi qarastyrylýda. Olar:
- Jumyrtqa – "Kóger LTD" JSHS
- Taýyq eti – "Otan Green Food" JSHS
- Kúrish – "Qyzylorda Qurylys" JSHS
- Kókónister – "Omarov" SHQ
Almaty qalasy Kásipkerlik jáne ınvestısıalar basqarmasy azyq-túlik qaýipsizdigin qamtamasyz etý jáne ÁMAT baǵasyn baqylaý jumystaryn turaqty túrde júrgizip keledi. Baǵanyń turaqtylyǵyn saqtaý maqsatynda jergilikti bılik óndirýshilermen, saýda jelilerimen kelissózder júrgizip, deldaldyqty azaıtý jáne áleýmettik azyq-túliktiń qymbattaýyna jol bermeý baǵytynda keshendi sharalar atqarýda.