Aýqymdy jıyn 14–16 mamyr kúnderi oflaın jáne onlaın formatta ótip jatyr.
Kongreske Qazaqstan men shetelden kelgen jetekshi dárigerler, ǵalymdar, densaýlyq saqtaý salasynyń sarapshylary qatysýda.
Uıymdastyrýshylar mereıtoı qonaqtaryn ulttyq mýzykamen, dástúrli qonaqjaılyqpen qarsy aldy.
Jıyn bastalar sátte ortalyqta qyzmet etken marqum áriptesterdi bir mınýt únsizdikpen eske aldy. Odan keıin ortalyqtyń tarıhynan syr shertetin qysqametrajdy derekti fılm kórsetildi.
Kongrestiń ashylý saltanatyn ortalyqtyń basqarma tóraǵasy, m.ǵ.k., qaýymdastyrylǵan profesor, MBA ıegeri Gýlfaırýz Ýrazbaeva júrgizdi. Alǵashqy quttyqtaý sózdi QR Densaýlyq saqtaý mınıstri Aqmaral Alnazarova onlaın formatta joldady.
Saltanatty sharada medısına ǵylymdarynyń doktory, profesor, Qazaqstannyń eńbek sińirgen qaıratkeri Nına Kaıýpova, Senat depýtaty Aınur Arǵynbekova, Májilis depýtaty Gúldara Nýrýmova, akademık, QR Prezıdenti janyndaǵy Ulttyq ǵylym akademıasynyń múshesi, Qazaqstan reprodýktıvti medısına qaýymdastyǵynyń prezıdenti Vácheslav Lokshın, sondaı-aq Ózbekstan, Qyrǵyzstan jáne basqa elderden kelgen sheteldik sarapshylar quttyqtaý sóz sóıledi.
Plenarlyq otyrystarda zamanaýı akýsherliktiń ózekti máseleleri; ana men bala densaýlyǵyn qorǵaýdaǵy ǵylymı jáne bilim berý úrdisteri; reprodýktıvti medısınadaǵy jasandy ıntellekt; ala týý kórsetkishin arttyrý joldary; ortalyqtyń halyqaralyq yntymaqtastyqtaǵy róli týraly máseleler talqylandy.
Kongres aıasynda sheberlik sabaqtary, ǵylymı mektepter, neonatologıa, genetıka, ÝDZ, reprodýktıvti densaýlyq boıynsha sesıalar ótýde. Sonymen qatar medısınalyq qural-jabdyqtar men farmónimderdiń arnaıy kórmesi usynylǵan.
Profesor Nına Kaıýpova óz sózinde: «Bizdiń ortalyqtan 47 doktor daıyndaldy. Bul – Qazaqstan ǵylymyna qosylǵan úlken úles. Eń bastysy – bul ómir syılaıtyn mamandyq. Aq halatty jandar árbir ana men ákeniń qýanyshyna sebepshi bola alady», – dep atap ótti.
Aıta keteıik, ana men bala saýlyǵy jolyndaǵy jarty ǵasyrlyq eńbektiń, ǵylym men tájirıbe úndestiginiń sımvolyna aınalǵan mereıtoılyq shara úsh kún – 14, 15, 16 mamyrǵa deıin jalǵasady.
Reprodýktıvti densaýlyq – ult bolashaǵynyń kepili
Vácheslav LOKSHIN, akademık, QR UǴA múshesi, Qazaqstan reprodýktıvti medısına qaýymdastyǵynyń prezıdenti:
– Bul ortalyq – elimizdegi akýsherlik-gınekologıalyq qyzmettiń kóshbasshysy. Reprodýktıvti densaýlyq – ana men bala saýlyǵynyń negizi. Qazir elimizde ana ólimi 7–8 esege azaıyp, Shyǵys Eýropa deńgeıine jetti. Fetaldyq hırýrgıa, EKO tehnologıalar qoljetimdi. Jyl saıyn 6 myńnan astam sábı EKO arqyly dúnıege keledi. «Ańsaǵan sábı» baǵdarlamasy aıasynda 30 myń prosedýra oryndalyp, 11 myń bala týyldy. Alaıda ásirese aýyl turǵyndary EKO jaıynda tolyq aqparattanbaǵan. Memleket esebinen 18 klınıkada EKO tegin jasalady.
Sonymen qatar, erlerdiń reprodýktıvti densaýlyǵy da nazarda bolýy kerek. Artyq salmaq, durys tamaqtanbaý bedeýlikke áser etedi. Jastarǵa jynystyq saýattylyqty mektepten bastap úıretý mańyzdy.