«AMANAT» partıasynyń Almaty qalalyq fılıalynyń Áıelder qanaty áıelderdiń kóshbasshylyq áleýetin arttyrýǵa baǵyttalǵan jumystardy kúsheıtýde
«AMANAT» partıasynyń Almaty qalalyq fılıaly janyndaǵy Áıelder qanaty áıelderdiń mártebesin kóterý jáne olardyń qoǵamdyq-saıası ómirge qatysýyn keńeıtýge baǵyttalǵan bastamalardy belsendi túrde júzege asyryp keledi. Partıanyń basymdyqtarynyń biri – qoǵamdaǵy áıelderdiń rólin nyǵaıtý.
Jumys toǵyz negizgi baǵytty qamtıdy: áıelderdiń saıası kóshbasshylyǵyn qoldaý; qoǵamdyq ıgilikti nyǵaıtý maqsatynda psıhologıalyq qyzmetterdiń damýyna járdemdesý; áıelder densaýlyǵyn saqtaý, otbasylyq qundylyqtardy ilgeriletý jáne balalardyń quqyqtaryn qorǵaý; eńbekti qorǵaý jáne áıelderdiń jumys oryndaryndaǵy qaýipsizdigin qamtamasyz etý; zań jobalaryna genderlik saraptama júrgizý; ǵylym salasyndaǵy áıelderdi qoldaý; áıelderge qatysty zorlyq-zombylyqqa qarsy turý; ınklúzıvti qoǵamdy damytý; genderlik teńdik qaǵıdattaryn ilgeriletý.
«AMANAT» partıasynyń Saıası kóshbasshylyq mektebi – bul áıelderdiń kóshbasshylyq áleýetin damytýǵa, olardyń qoǵamdyq-saıası proseske belsendi qatysýyna jáne azamattyq ustanymyn qalyptastyrýǵa baǵyttalǵan bilim berý alańy.
Sabaqtar aıasynda qatysýshylar saıasattaný, quqyq, komýnıkasıa, genderlik saıasat jáne saılaý prosesi boıynsha bilim alady. Oqý baǵdarlamasy dáristerdi, trenıńterdi, sheberlik sabaqtaryn, sondaı-aq qoldanystaǵy depýtattarmen, qoǵam qaıratkerlerimen jáne sarapshylarmen kezdesýlerdi qamtıdy. Erekshe nazar kópshilik aldynda sóıleý daǵdylaryn damytýǵa, basqarýshylyq quzyretterdi nyǵaıtýǵa jáne strategıalyq oılaýdy jetildirýge aýdarylady.
Qatysýshylar óz bastamalaryn ázirlep, tálimgerlerden keri baılanys alyp, kásibı baılanystar jelisin qurý múmkindigine ıe bolady. Mektep kásibı ósýge ǵana emes, sonymen birge áıelderdiń áleýmettik mańyzy bar jobalarǵa belsendi qatysýyna, saılanbaly laýazymdarǵa kandıdatýralaryn usynýyna jáne kóshbasshylyq ambısıalaryn iske asyrýyna jol ashady.
Saıası kóshbasshylyq mektebiniń kezekti sabaǵy Almatyda «Men – kandıdatpyn. Ózińdi senimdi tanystyrý jáne qoldaý tabý joldary» taqyrybynda ótti. Spıker retinde @iteachme.kz dırektory, QR Eńbek jáne halyqty áleýmettik qorǵaý mınıstriniń keńesshisi Zahıra Begalıeva qatysyp, saılaýshylarmen senimdi qarym-qatynas ornatý jáne tıimdi komýnıkasıa júrgizýdiń praktıkalyq tásilderimen bólisti.
Kezdesý qorytyndysynda qatysýshylar alǵan bilimderiniń qundylyǵyn jáne kóshbasshylyq qasıetterdi damytýǵa, áıelderdiń saıası belsendiligin arttyrýǵa serpin beretin shabytty orta qalyptasqanyn atap ótti.