Almatyda 2023 jyldyń sońyna deıin qozǵalysy shekteýli azamattar paıdalanatyn 7,5 myń áleýmettik nysannyń qoljetimdiligi baǵalanady, dep habarlaıdy Almaty-akshamy.kz
Almatyda ákim Erbolat Dosaevtyń tapsyrmasy boıynsha bıyl 2 tamyzdan bastap inva.gov.kz júıesine derekterdi engize otyryp, áleýmettik nysandardy tólqujattaý boıynsha aýqymdy jumys júrgizilip otyr. «Almaty qalasyn damytýdyń 2025 jylǵa deıingi baǵdarlamasy jáne 2030 jylǵa deıingi orta merzimdi perspektıvalar» aıasynda barlyǵy 75 myń nysandy tólqujattaý josparǵa engen.
Tólqujattaý – múgedektigi bar adamdardy beıimdeý boıynsha usynymdy ázirleýge qajetti nysandar men olar kórsetetin qyzmetterdiń qoljetimdilik jaı-kúıin esepke alý jáne baǵalaý. Osylaısha, qoldaǵy barlyq derekter áleýmettik ınfraqurylym nysanynyń qoljetimdilik pasportyna engiziledi.
Qalalyq ınklúzıvti ortamen qamtamasyz etý jónindegi jumys tetigi, sonymen qatar, pasporttaý jónindegi josparlar qalanyń aýdandary boıynsha bólinedi. Nysandar tólqujatynyń negizinde múgedektigi bar adamdar úshin nysandy odan ári beıimdeý úshin smeta qalyptastyrylady.
Josparlardy bólý aýdandarda turatyn múgedektigi bar adamdardyń jáne ınfraqurylym nysanynyń sanyn eskere otyryp júzege asyrylǵanyn atap ótemiz. Aýdandyq ákimdikter pasporttaý jáne inva.gov.kz júıesine derekterdi odan ári engizý úshin nysandardyń tizbesin usyndy.
Qazirgi tańda Almaty qalasy boıynsha halyqtyń mobıldiligi tómen toptary (múgedektigi bar adam, zeınetker jáne t.b.) úshin qoljetimdilikpen qamtamasyz etilgen 4 261 áleýmettik ınfraqurylym nysany, onyń ishinde tolyq qoljetimdiligi 778 nysan, ishinara qoljetimdiligi – tirek-qımyl apparaty buzylǵan adamdar úshin 895 nysan, estý qabileti buzylǵan adamdar úshin 1002 nysan, kórý qabileti buzylǵan adamdar úshin 905 nysan, arbaǵa tańylǵan adamdarǵa arnalǵan 895 nysan. Barlyq aqparat inva.gov.kz portalyna engizildi.
Jekemenshik nysandarǵa kelsek, derekter buzýshylyqtardy joıý týraly nusqama berý úshin Almaty qalasy boıynsha Eńbek jáne áleýmettik qorǵaý Komıtetiniń departamentine jiberiledi (aıyppuldar 120-dan 400 AEK-ke deıin nemese 414 myńnan 1,4 mln.teńgege deıin).
Buǵan qosa, Jumyspen qamtý jáne áleýmettik baǵdarlamalar basqarmasy aýdandyq ákimdiktermen, eńbek departamentimen jáne qala prokýratýrasymen birlesip tólqujattaý barysynda berilgen usynymdardy tekserý boıynsha monıtorıń júrgizedi.
«Múgedektigi bar adamdardy áleýmettendirý jáne qoǵamǵa sińisý máselesine erekshe mán beremiz. Olardy áleýmettendirý tehnıkalyq kómekshi quraldarmen jáne ońaltýdyń áleýmettik qyzmetterimen ýaqytyly ári ataýly qamtamasyz etý arqyly iske asyrylady. Ári qalada qajetti barlyq jaılylyǵy bar ınklúzıvti orta qurý. Búginde Almatyda múgedektigi bar 55 myń adam turady. Olardyń ishinde 2 myń adam arbany paıdalanady, 2,8 myń adamnyń estý, 5,6 myń adamnyń kórý qabileti buzylǵan. Nysandardy beıimdeý jáne barlyq oblysta ınklúzıvti orta qurý jumysy jalǵasady», - dedi Almaty qalasy ákiminiń orynbasary Ásem Núsipova.
Aıta keteıik, qalada ınklúzıvti qoǵam qurý úshin «Shyńǵa órleý», «Shkola nezavısımoı jıznı», «Teń qoǵam» áleýmettik qoldaý ortalyqtary sıaqty áleýmettik jobalar jumys isteıdi.