Oǵan qosa vıntovka men pnevmatıkalyq tapansha da bar.
Almatyda 5 myń oq-dári men tankige qarsy jaýyngerlik snarádtar tárkilendi, dep habarlaıdy Almaty-akshamy.kz
Tengrinews.kz habarlaýynsha, İshki ister mınıstrligi qańtardaǵy jappaı tártipsizdik kezinde urlanǵan qarýdy izdeý jumystary qalaı júrip jatqanyn aıtty.
Búgingi tańda 1 006 dana qarý men 20 307 oq-dári tárkilengen.
«Máselen, jedel is-sharalar barysynda Almatynyń "Shańyraq-2" yqshamaýdanynda eki adam ustalyp, olardan tapanshanyń (2880 dana) jáne avtomattyń (2160 dana) 5 myń patrony bar myrysh jáshikteri, qorǵanysh keýdesheler, qalqandar men tizeqaptar sıaqty quraldar, 2 tankige qarsy jaýyngerlik snarád, tegis uńǵyly myltyq, 7 pnevmatıkalyq vıntovka, onyń ishinde bireýiniń optıkalyq kózdeýishi bar jáne pnevmatıkalyq tapansha tárkilendi», - dedi İİM Tergeý departamentiniń bastyǵy Sanjar Ádilov OKQ brıfıńinde.
Ádilov qarý-jaraq dúkenderi qalaı tonalǵanyn da aıtty.
«Almatydaǵy jappaı tártipsizdik kezinde bir top kúdikti «Orýjeınık» ańshylyq dúkenine jeńil avtokólikpen kelip, esigin buzyp, 15 tegis uńǵyly myltyq pen 4 oıyq karabındi, onyń ishinde optıkalyq kózdeýishi bar karabındi urlap ketken. Urlanǵan qarý Almaty qalasy men Almaty oblysynyń aýmaǵynda arnaıy jabdyqtalǵan jerde zańsyz saqtalǵan. Sondaı-aq, Almatyda jappaı tártipsizdikke qatysýshylardyń biri ustaldy, ol túnde belgisiz úsh adammen birge eki jeńil kólikpen «Kamerat» dúkenine baryp, qarý-jaraq urlap ketken», - dedi ol.
Onyń aıtýynsha, urlanǵan zattardyń bir bóligi, onyń ishinde oq-dárileri bar 8 tegis uńǵyly myltyq turǵyn úıdiń shatyrynan tabylyp, tárkilengen. Taǵy bir jerden polısıa qyzmetkerleri tártipsizdik kezinde paıdalanylǵan zattardy - oq-dárileri bar sıgnal revolverin, janǵysh qospasy bar 4 shyny bótelkeni, gaz maskasyn jáne polısıa qyzmetkerleriniń 6 arnaıy quralyn tapqan.
Qylmyskerler urlanǵan qarýdy satpaq bolǵany da anyqtaldy.
«18 aqpanda Jambyl oblysynyń Baızaq aýdanynda jedel is-sharalar ótkizý kezinde krımınaldyq polısıa qyzmetkerleri urlanǵan Kalashnıkov avtomatyn satyp jatqan jerinen Tarazdyń 45 jastaǵy turǵynyn ustady. Kúdiktiden jeke tintý kezinde qarý satýdan túsken 300 myń teńge, al kólik salonynan oq-dárisi bar eki Kalashnıkov avtomaty tárkilendi», - dedi Ádilov.