Almatydaǵy Kardıologıa jáne ishki aýrýlar ǵylymı-zertteý ınstıtýtynda úshinshi ret júrekti transplantasıalaý operasıasy jasaldy.
5 saǵatqa sozylǵan kúrdeli operasıany kardıohırýrgıa bólimshesiniń meńgerýshisi Rústem Tóleýtaev UMC «Júrek ortalyǵy» №2 kardıohırýrgıa bólimshesiniń meńgerýshisi Svetlana Novıkovamen, sondaı-aq anestezıologtar men kardıohırýrgtarmen birlesip júrgizdi.
Almaty qalasynyń Ortalyq qalalyq aýrýhanasyna túsken 40 jastaǵy er adam donor boldy, dárigerler pasıenttiń mı ólimin rastady.
Júrek Almaty oblysy Talǵar qalasynyń turǵyny 43 jastaǵy er adamǵa transplantasıalandy. Ol ıshemıalyq kardıomıopatıaǵa, júre paıda bolǵan júrek aqaýyna, mıtraldy qaqpaqsha qyzmetiniń jetkiliksizdigine, 26% shyǵarylý fraksıasy tómendegen sozylmaly júrek qyzmetiniń jetkiliksizdigine, 2022 jyly ınfarktqa shaldyqqan. Naýqasta azdaǵan dene qımyly kezinde entigý, júrektiń durys jumys istemeýi, jalpy álsizdik, bas aınalý shaǵymdary boldy.
Emdeýge qaramastan, jaǵdaıy jaqsarmady, júrektiń kóp bóligi tyrtyqtan turyp, jıyrylmady.
Transplantasıadan buryn oǵan birneshe ret stent qoıylǵan, kardıoverter-defıbrıllátor ımplantasıalandy. Aýrýdyń qolaısyz boljamyn eskere otyryp, aǵymdaǵy jyldyń qańtarynda UMC mamandary LVAD ımplantasıalaý usynǵan, biraq naýqas bas tartty. Emdeýden nátıje bolmaǵandyqtan júrek transplantasıasyn kútý tizimine qoıyldy.
«Júrek transplantasıasy búgingi kúni júrek qyzmeti jetkiliksizdiginiń sońǵy satysyndaǵy naýqastardy emdeýdegi «altyn standarty» bolyp tabylady. Ókinishke oraı, ondaı pasıentterdiń sany jyldan jylǵa artyp keledi. Transplantasıany qajet etetinderdiń barlyǵyna transplantasıa jasaý múmkindigi shekteýli, sebebi donorlyq organ jetispeıdi. Mysaly, 2025 jylǵy 10 mamyrdaǵy jaǵdaı boıynsha Qazaqstanda júrek transplantasıasyn kútý paraǵynda 139 eresek jáne 7 bala tur», – deıdi Kardıologıa jáne ishki aýrýlar ǴZI Basqarma tóraǵasy Marat Pashımov.
Marat Orynbasaruly UMC «Júrek ortalyǵy» men Transplanttaýdy jáne joǵary tehnologıalyq medısınalyq qyzmetti úılestirý jónindegi respýblıkalyq ortalyǵyna kómek pen qoldaý kórsetkeni úshin alǵysyn bildirdi.
Donordyń júregi ǵana emes, sonymen qatar 2 balaǵa búıregi transplantasıalanǵanyn, eki móldirqabyǵy alynǵanyn da aıta ketý kerek.