Almatylyq jas - Dulat Nabıev: «Qalany tazartudy sózben emes, íspen kórsetu kerek»
Almatyda áleumettík jelí arqyly paıdaly kontent jasap, kópshílíktí ıgí íske úndep júrgen erekshe joba bar. Onyń avtory – medıa mamany Dulat Nabıev. Ol 20 kún būryn TikTok pen Instagram jelílerínde #project_virus_almaty atty ekochellendj bastap, qala tazalyǵyn jaqsartuǵa jeke úlesín qosyp keledí.
100 qap pen 3 sypyrtqy: ıgí ístíń basy
Dulat óz bastamasyn eshkímníń kómegínsíz, qolynda bar qūraldarmen bastap ketken. Júz qap pen úsh sypyrtqyny alyp, qoqys jınalǵan aumaqtardy tazalauǵa kírísken. Ol būl ísín eshqandaı jarnama úshín emes, azamattyq jauapkershílíkpen jasap júr.
«Ózgení ózgertkíń kelse, aldymen ózíńnen basta», – deıdí ol.
Chellendjdíń alǵashqy aptasy Saıran kólíníń aınalasynda óttí. Qazír būl bastamaǵa óz erkímen qosylyp jatqan eríktílerdíń sany kúnnen-kúnge artyp keledí.
Qalanyń tazalyǵy – ár adamnyń mádenıetíne baılanysty
Dulattyń aıtuynsha, qaladaǵy qoqys máselesí tek kommunaldyq qyzmetpen sheshílmeıdí. Būl – ár adamnyń íshkí mádenıetí men jauapkershílígíne tíkeleı baılanysty.
«Qoqys – tek tabıǵatqa emes, adamnyń densaulyǵyna, psıhologıyasyna, estetıkasyna da zıyan. Adam ózín, qalasyn, ortasyn syılasa, mūndaı másele bolmas edí», – deıdí ol.
90 kúndík chellendj: maqsaty – nátıjege jetu
Búgín jobanyń 18-kúní. Dulat pen onyń tobyndaǵy 20-ǵa juyq adam būl ístí kem degende 90 kúnge deıín jalǵastyrudy josparlap otyr. Eger nátıje sáttí bolsa, mūndaı ekochellendj basqa qalalarda da jalǵasyn tabuy múmkín.
Internettegí bos kontentke – balama ūsynys
Medıa salasynyń mamany retínde Dulat TikTok pen Instagram-da paıdaly árí motıvatsıyalyq kontent jasaudy qolǵa alǵan. Onyń TikTok paraqshasyndaǵy jazylushylar sany sońǵy aptalarda 10 myńnan 30 myńǵa deıín kóbeıgen. Instagram-daǵy oqyrmandary da ekí esege artyp, 17 myńnan asqan.
«TikTok-ta bos kontent kóp. Kópshílígí laık pen podpıska úshín túsíríledí. Bíraq men oǵan qarsy paıdaly kontent jasap kórgím keldí. Árí ózímníń aǵam audıtorıyań negízínen jastar, olardy jaqsy nársege úırete alasyń dep baǵyt beríp, jón síltedí», – deıdí ol.
Bastamaǵa qoldau artyp keledí
Dulattyń būl jobasy kópshílíktíń nazaryn audaryp, resmı organdardan da qoldau tauyp otyr. Almaty qalasy Jastar sayasaty basqarmasy, ákímdík ókílderí, típtí mınıstrlík deńgeıínde de jobanyń mańyzdylyǵy qarastyrylyp jatyr.
Soǵan qaramastan, Dulat būl ístí eshkímge artyp nemese míndettep otyrǵan joq:
«Men būl chellendjdí eń aldymen ózím úshín bastadym. Kómek kórsetkenderge alǵysymdy aıtamyn. Al kómektespegenderge renjímeımín de», – deıdí ol.
@project_virus_almaty – paıdaly bastamanyń brendíne aınaluda
Qazír būl bastama áleumettík jelílerde @project_virus_almaty degen atpen tanymal bolyp, kóptegen jastardy azamattyq belsendílíkke úndep otyr. Dulattyń maqsaty – óz ísímen kópke úlgí kórsetu. Sońǵy kúnderí Dulat pen onyń komandasy "Altyn Orda" bazary mańyn tazartuǵa kírísken.