Áskerı qyzmetshiler arasynda "Ásker barysy" tıtýlyna qazaq kúresinen ótken IX jabyq týrnır aıaqtaldy. Jarys QR Qorǵanys mınıstrliginiń Sport komıteti – Ortalyq sport klýbynyń bazasynda ótti.
Eń myqty balýan ataǵy úshin Qarýly kúshter, UQK Shekara qyzmeti, Ulttyq ulan, TJM atynan qatysqan 19 sportshy jáne "Jas sarbaz" qozǵalysynyń 18 myqtysy synǵa tústi, dep habarlaıdy Almaty-akshamy.kz.
Jarystyń qurmetti qonaqtary qazaq kúresi ulttyq qaýymdastyǵynyń alǵashqy prezıdenti Qazaqstannyń eńbek sińirgen jattyqtyrýshysy profesor Erǵalı Muhıddınuly men "Qazaqstan barysy" týrnıriniń birinshi jeńimpazy Ulan Rysqul.
Týrnır jeńimpazdaryn QR Qorǵanys mınıstrligi Sport komıtetiniń tóraǵasy polkovnık Arman Ábeýov quttyqtady.
«Bıyl alǵash ret "Jas sarbaz" balalar-jasóspirimder qozǵalysynyń tárbıelenýshileri arasynda ótetin týrnır aıasynda dástúrler men urpaqtar sabaqtastyǵyn nyǵaıtý maqsatynda jarystar ótkizdik. Jyl saıyn qazaq kúresi jastar arasynda tanymal bolyp kele jatqany bizdi qýantady», – dedi ol.
Jarys qorytyndysy boıynsha birinshi jáne ekinshi oryndardy Ortalyq sport klýbynyń sportshylary serjant Ádil Orazbaev pen aǵa leıtenant Marat Baıqamurov jeńip aldy. Úshinshi oryn Ulttyq ulannyń 5573 áskerı bóliminiń áskerı qyzmetshisi serjant Bekzat Altybaevqa berildi.
Desanttyq-shabýyldaý áskerleri janyndaǵy áskerı-patrıottyq klýbtyń tárbıelenýshisi Nurseıit Sahybaı "Jas sarbaz barysy – 2024" respýblıkalyq týrnıriniń jeńimpazy atandy. Kúmis júlde áskerı-patrıottyq klýbtyń tárbıelenýshisi Serikqalı Saǵıatqa, qola – Áýe qorǵanysy kúshteri janyndaǵy áskerı-patrıottyq klýbtyń tárbıelenýshisi Ábish Ábilqaıyrǵa buıyrdy.
Qazylar alqasynyń sheshimi boıynsha altyn belbeý ıegeri serjant Ádil Orazbaev bedeldi "Qazaqstan barysy" respýblıkalyq týrnırinde Qarýly kúshterdiń namysyn qorǵaıtyn bolady. Alda ol eldiń eń myqty balýany ataǵy úshin baǵy men babyn synap kóredi.
Esterińizge sala keteıik, 2023 jyly "Ásker barysy" týrnıriniń jeńimpazy armıa sportshysy Marat Baıqamurov boldy.