Bostandyq aýdanynyń turǵyndarymen kezdesýde Almaty ákimi Erbolat Dosaev bilim berý ınfraqurylymyn damytý sharalary týraly aıtty.
Ulttyq «Jaıly mektep» jobasy aıasynda bıyl 4 myń orynǵa arnalǵan 2 jańa mekteptiń qurylysy aıaqtalady: mamyr aıynda – Rozybakıev kóshesinde, tamyz aıynda – Egizbaev kóshesinde.
«Bıyl qyrkúıek aıynda №73 mektep ǵımaratyn qaıta jańartý jáne 450 orynǵa arnalǵan qosymsha ǵımarat qurylysyn aıaqtaý josparlanǵan. 2025 jyldyń sońyna deıin №10 mektep-ınternaty men №189, №191 mektepteri seısmıkalyq turǵyda nyǵaıtylyp, kúrdeli jóndeý jumystary aıaqtalady, sondaı-aq, Respýblıkalyq fızıka-matematıka mektebiniń ǵımaraty rekonstrýksıalaýdan ótedi. Al №60 mekteptiń rekonstrýksıasy osy jyldyń sáýir aıynda bastalyp, 2026 jyldyń qyrkúıeginde aıaqtalady», – dedi Erbolat Dosaev.
Mektepke deıingi bilim berý mekemeleriniń jelisin keńeıtý jumystary da qarqyndy júrgizilýde. 2025 jyldyń naýryzyna deıin Orbıta-3 shaǵyn aýdanyndaǵy burynǵy balalar úıiniń eki ǵımaraty qaıta jańǵyrtylady. Onyń bireýi 240 oryndyq balabaqshaǵa, al ekinshisi erekshe bilim berý qajettiligi bar balalarǵa arnalǵan 100 oryndyq túzetý balabaqshasyna aınalady.
Sonymen qatar, №81, №87 jáne №137 balabaqshalarynda seısmıkalyq nyǵaıtylyp, kúrdeli jóndeý jumystary júrgizilip jatyr, olar 2025 jyldyń sońynda aıaqtalady.
Aıta keteıik, 2024 jyly Bostandyq aýdanynda 801 balaǵa arnalǵan 15 jeke balabaqsha ashyldy. «Balalardyń qosymsha bilim alýy men damýyna qolaıly jaǵdaı jasaý maqsatynda buǵan deıin Vahtangov kóshesinde ornalasqan 1964 jyly salynǵan Oqýshylar úıiniń eski ǵımaratyn buzý týraly sheshim qabyldanǵan bolatyn. Onyń ornyna barlyq zamanaýı standartqa saı jańa ǵımarat salyndy. Sáýir aıynda biz balalarymyz úshin ashýdy josparlap otyrmyz», – dedi Erbolat Dosaev.
Qazirgi zamanǵa saı eki qabatty ǵımaratta 12 shyǵarmashylyq kabınet, pikirtalas klýby, baǵdarlamalaý, 3D modeldeý, qurylymdaý, foto jáne beınemontaj úıirmeleri ashylady. Oqýshylar úıinde aptasyna 5-17 jas aralyǵyndaǵy 2 myń bala bilim ala alady.
Aıta keteıik, buǵan deıin Almatynyń Almaly aýdanynda da jańa zamanaýı Oqýshylar úıi salynǵan bolatyn. Onda kún saıyn 400 bala bilim alady.