«Taza Qazaqstan» baǵdarlamasy aıasyndaǵy «Almaty – bizdiń ortaq úıimiz» aksıasy aıasynda qalada jańa vandalızmge tózimdi qoqys jáshikterin ornatý bastaldy. Bul bastama sanıtarlyq jaǵdaıdy jaqsartyp, kóshelerdiń lastaný deńgeıin tómendetýge baǵyttalǵan. Bekitilgen josparǵa sáıkes, 2025 jyly Almatyda 12 036 jańa qoqys jáshigi ornatylady. Olardyń kólemi 80 jáne 120 lıtr, dep habarlaıdy aqshamnews.kz
Komýnaldyq ınfraqurylymdy damytý basqarmasynyń málimetinshe, bul jáshikter aýdan ákimdikteriniń ótinimi negizinde ornatylyp, qalanyń tazalyǵyn jaqsartýǵa arnalǵan. Qoqys jınaý barysyn jeńildetý úshin jáshikterdiń ishinde 120 lıtrlik polıetılen paketter qarastyrylǵan.
Almaty ákimdigi júrgizgen taldaý kórsetkendeı, qala kóshelerinde 40-60 lıtrlik qoldanystaǵy qoqys jáshikteri tez tolyp, qoqys máselesin ýshyqtyryp otyr. Osyǵan baılanysty, eskirgen jáshikterdi aýystyrý týraly sheshim qabyldandy:
• 80 lıtrlik gıperboloıdti qoqys jáshikteri saıabaqtar men skverlerge ornatylady.
• 80 lıtrlik tórtburyshty jáne sılındrlik jáshikter qalanyń negizgi kósheleri men magıstraldarǵa qoıylady.
• 120 lıtrlik tórtburyshty jáshikter halyq kóp jınalatyn oryndarǵa – aıaldamalarǵa, metro beketterge, jerústi jáne jerasty ótkelderine ornatylady.
2024 jyly qala bıligi qoldanystaǵy jáshikterdiń tez tolýyna baılanysty qoqys shyǵarý marshrýttaryn kóbeıtýge májbúr boldy.
Eske sala keteıik, Almaty ákimdigi «Taza Qazaqstan» baǵdarlamasy aıasynda «Almaty – bizdiń ortaq úıimiz» ekologıalyq naýqanynyń bastalǵanyn habarlady. Ol 2025 jylǵy 1 naýryz – 1 sáýir aralyǵynda ótedi. Naýqannyń maqsaty – turǵyndardyń ekologıalyq mádenıeti men jaýapkershiligin arttyrý.
Naýqan 4 negizgi kezeńge bólingen, onyń alǵashqysy – «Taza kósheler». Bul kezeńde aıaldamalar, baǵdarshamdar, ótkelder, jol belgileri men jaryqtandyrý qurylǵylary tazartylady, sondaı-aq qoǵamdyq oryndarǵa jańa qoqys jáshikteri ornatylady.
«Almaty – bizdiń ortaq úıimiz» naýqany týraly barlyq aqparat Almaty.kz saıtynda jarıalanady.