Almatyda «Jaıly mektep» ulttyq jobasy aıasyndaǵy qurylys qarqyndy jalǵasýda, dep habarlaıdy aqshamnews.kz
Qala ákiminiń orynbasary Beıbit Shahanov jańa oqý oryndarynyń qurylys barysyn tekserdi.
Qazirgi tańda megapolıste 11 700 oqýshyǵa arnalǵan 8 jańa mekteptiń qurylysy júrip jatyr. Nysandar qalanyń ár aýdanynda Qazaq Stroy, Azimut, Time Group Construction jáne BI Group syndy jeke kompanıalardyń qarajaty esebinen salynýda. Qurylys aıaqtalǵan soń mektepter Almaty qalasynyń komýnaldyq menshigine beriledi.
Qurylys kompanıalarynyń ókilderi barlyq jumys belgilengen merzimde aıaqtalatynyn atap ótti.
«Bizdiń basty maqsatymyz – balalardyń úshinshi toqsannan bastap oqýyn jańa mektepterde jalǵastyrýy. Eshqandaı syltaý qabyldanbaıdy. Biraq jyldamdyq sapaǵa áser etpeýi kerek. Mektepterdiń jabdyqtalýy, sport alańdarynyń sapasy jáne abattandyrý deńgeıi joǵary standarttarǵa saı bolýy tıis», – dedi Beıbit Shahanov.
Bıyl Almatyda ulttyq joba aıasynda ákimdik janyndaǵy jobalyq keńseniń qoldaýymen 22,5 myń oqýshyǵa arnalǵan 12 mekteptiń qurylysy aıaqtaldy. Onyń ishinde 7 mektep jańa oqý jylynyń basynda ashyldy, al 5 mektep ekinshi toqsanda oqýshylardy qabyldaıdy.