Almatyda turǵyndardyń jaılylyǵy úshin aýla aýmaqtaryn kúrdeli jóndeý jalǵasýda, dep habarlaıdy almaty-akshamy.kz
Almaty ákimi Erbolat Dosaev jumys sapary jáne halyqpen kezdesý barysynda Áýezov aýdanyndaǵy, Jandosov kóshesi, 59/1, 59B, 59V kóshesindegi 10 shaǵyn aýdandaǵy aýla aýmaǵyn kúrdeli jóndeýmen tanysty.
Áýezov aýdanynyń ákimi Abzal Egemberdıev qala basshysyna qurylys - montaj jumystary maýsym aıynda bastalyp, bıyl qazan aıynda aıaqtalady dep esep berdi. Onyń aıtýynsha, kúrdeli jóndeý «AlmatyBasJospar» ǴZI aýla aýmaqtaryn abattandyrý boıynsha bekitken ádistemelik qural negizinde júrgiziledi.
Aýlalardy aralaý barysynda Erbolat Dosaev sporttyq jáne balalar oıyn alańdaryn jańǵyrtýdy, sport alańyn jańartýdy, oryndyqtarmen demalys aımaqtaryn jabdyqtaýdy tapsyrdy. Almaty ákimi qaýipsizdik pen jaılylyq sıaqty ólshemderge erekshe nazar aýdarý qajet ekenin atap ótti. Sondaı-aq, ákim barlyq aýla nysandaryn biryńǵaı keshenge biriktirý kerektigin aıtty.
Aýla turǵyndary Erbolat Dosaevqa aýmaqty abattandyrǵany úshin alǵys aıtyp, ákimnen orta jastaǵy adamdarǵa arnalǵan trenajerler ornatýdy surady. Erbolat Dosaev aýdan basshylyǵyna jergilikti turǵyndardyń ótinishin oryndaýdy tapsyrdy.
Aıta keterligi, 10 shaǵyn aýdandaǵy 59/1, 59B, 59V úıler 1967 jáne 1969 jyldary salynyp, paıdalanýǵa berilgen. Sońǵy ret munda jóndeý jumystary 14 jyl buryn – 2010 jyly júrgizildi.
Halyqtyń tyǵyzdyǵy jáne kópqabatty turǵyn úılerdiń kóptigi baıqalatyn Áýezov aýdanynda aýlalardy abattandyrý jáne jańǵyrtý birinshi kezektegi máselelerdiń biri bolyp tabylady. Ótken jyly aýdanda Erbolat Dosaevtyń tapsyrmasy boıynsha 150-den astam aýlaǵa jóndeý júrgizildi, aǵymdaǵy jyly 23 aýlaǵa kúrdeli jóndeý júrgizý josparlanýda. Bul maqsattarǵa 1,6 mlrd teńge bólindi.