Shahar basshysy megapolıstiń damýyna arnalǵan bes basym baǵytty atap ótti, dep habarlaıdy aqshamnews.kz
Búgin Almaty óziniń basty merekesin — Qala kúnin atap ótýde. Osy aıtýly kúni megapolıs ákimi Darhan Satybaldy qala turǵyndary men qonaqtaryna arnap quttyqtaý sóz sóılep, Almatynyń tarıhı mańyzyn atap ótip, onyń damýyndaǵy negizgi basymdyqtardy aıqyndady.
«Qymbatty almatylyqtar, qadirli qala qonaqtary! Sizderdi Qala kúnimen shyn júrekten quttyqtaımyn! Almaty — elimizdiń Táýelsizdiginiń altyn besigi, Qazaqstan tarıhyndaǵy jańa dáýirdiń bastaý alǵan qasıetti mekeni. Búginde bizdiń qalamyz óziniń qaıtalanbas rýhanı-mádenı murasyn saqtap, zamanaýı ári jaıly megapolıs retinde alǵa qadam basyp keledi», — dedi Darhan Satybaldy.
Ákim Almatynyń tek mádenı jáne bilim berý ortalyǵy ǵana emes, sonymen qatar el ekonomıkasynyń basty qozǵaýshy kúshi ekenin erekshe atap ótti. Búginde megapolıs ulttyq ekonomıkanyń besten bir bóligin jáne memlekettik búdjet kiristeriniń shıreginen astamyn qamtamasyz etip otyr. Bir turǵynǵa shaqqandaǵy jalpy óńirlik ónim 29 myń AQSH dollaryna jetip, keıbir eýropalyq elderdiń deńgeıinen asyp tústi.
Darhan Satybaldynyń aıtýynsha, bul jetistikter óte mańyzdy bolǵanymen, qalanyń eń basty baılyǵy — onyń turǵyndary:
«Almatynyń eń basty qundylyǵy — bul sizder, onyń turǵyndary. Sizderdiń eńbekterińiz, jigerlerińiz ben belsendilikterińizdiń arqasynda Almaty óz ereksheligin saqtap qalyp, óńirdegi aldyńǵy qatarly megapolısterdiń birine aınalýda».
Sondaı-aq ákim Memleket basshysy Qasym-Jomart Toqaev qoıǵan mindetterge arnaıy toqtaldy. Onyń aıtýynsha, Almatyny damytýda ekologıa, qaýipsizdik jáne zamanaýı qalalyq ortany qalyptastyrý basty basym baǵyttar bolmaq. Aldaǵy jyldary aýqymdy ınfraqurylymdyq jobalar iske asyrylady, kólik júıesi men sıfrlyq qyzmetter damytylady, áleýmettik jáne mádenı ınfraqurylym jańǵyrtylady.
Quttyqtaý sóziniń sońynda Darhan Satybaldy qala turǵyndaryna amandyq, baqyt pen bereke tiledi:
«Almaty — bárimizdiń ortaq úıimiz. Biz bul qalanyń sulýlyǵyn, dástúrlerin saqtap, ony óńirdegi eń zamanaýı, jasyl jáne jaıly megapolısterdiń birine aınaldyrý úshin jumyla eńbek etýimiz kerek. Qymbatty Almaty, kórkeıe ber, elimizdiń birligi men damý sımvolyna aınala ber!»
Aıta keteıik, bul — Darhan Satybaldynyń Almaty qalasynyń ákimi retinde jasaǵan alǵashqy aýqymdy úndeýi. Bul sózinde ol qala turǵyndaryn merekemen quttyqtap qana qoımaı, megapolıstiń damýyndaǵy bes negizgi baǵytty da atap ótti:
- kólik júıesin jáne ekologıany damytý,
- jaılylyq pen qaýipsizdikti arttyrý,
- ornyqty ekonomıkalyq ósim men kásipkerlikti qoldaý,
- áleýmettik ınfraqurylymdy jańǵyrtý,
- ashyqtyq pen turǵyndarmen tıimdi dıalog ornatý.