Jyl saıyn búkil álemde 17 qarashada Halyqaralyq stýdentter kúni atap ótiledi.
Osynyń qurmetine megapolıste 10-17 qarasha aralyǵynda Almaty Students Week aksıasy ótedi, ol týraly Almaty qalasy Jastar saıasaty basqarmasynyń ókilderi ÓKQ brıfıńinde aıtyp berdi, dep habarlaıdy almaty-akshamy.kz.
Megapolıste 35 joǵary oqý orny bar, onda 200 myńǵa jýyq stýdent oqıdy, onyń ishinde 124 myńnan astamy basqa óńirlerden kelgen stýdentter.
«Almaty student week» festıvaliniń mańyzdy qyry ol stýdenttik jastardyń birligin arttyrý. Jastarymyzdy patrıottyq rýhqa tárbıeleý. Jalpy, festıváldiń negizgi ıdeıasy stýdentterdi belsendi ortaǵa tartý, sondaı-aq daryndy, talantty jastar men qoǵam kóshbasshylaryn anyqtaý», - dedi Almaty qalasy Jastar saıasaty basqarmasynyń JOO-men jónindegi bólim basshysy Juldyz Jorabek.
Spıkerdiń sózinshe, stýdent jastardyń jeke jáne kásibı ósýine jaǵdaı jasaý, qoǵamda tabysty áleýmettenýi, onyń zıatkerlik jáne shyǵarmashylyq áleýetin arttyrý maqsatynda «StudUnion» alańy jumys jasaıdy. Stýdent jastar arasyndaǵy pikir kóshbasshylary bolǵandyqtan jastar jónindegi komıtetter qaýymdastyǵy jınalyp, jastar arasyndaǵy kóptegen máselelerdi qarastyrady.
«Ótken demalys kúnderi, komıtetter qaýymdastyǵy 3 kúndik lagerge baryp joǵary oqý oryndarynyń tájirbılerimen almasty. Sondaı-aq jyldyń sońynda úzdik komıtet basshysyn jáne belsendi stýdentti marapattaý rásimi ótedi», - dep tolyqtyrdy ol.
Stýdenttik aptalyq Almaty qalasy joǵary oqý oryndarynyń stýdentteriniń shyǵarmashylyq qabiletterin damytý, jastardyń zıatkerlik áleýetin arttyrý jáne memlekettik tildi nasıhattaý maqsatynda ótetin «SUPER LIGA» KTK-nyń fınaldyq oıyndarynan bastalady.
Sonymen birge, «IQ-ALA jastary» jobasy aıasyndaǵy zıatkerlik oıyndardyń fınalyn, stýdentter arasynda kıbersporttan týrnır ótkizý josparlanyp otyr.
Sondaı-aq, Almaty qalasynyń joǵary oqý oryndarymen birigip kóptegen is-sharalardy ótkizý josparlanyp otyr:
- Qazaq ulttyq ýnıversıtetimen 16 qarashada Joldasbekov atyndaǵy stýdentter saraıynda «Biz – Jańa Qazaqstan Jastarymyz!» birinshi kýrs stýdentteri arasynda gala-konsert jáne kórkemónerpazdar festıvali ótedi. Bul keshte birinshi kýrs stýdentteri arasynda gala-konsert, sondaı-aq kórkemónerpazdar festıvali ótedi. Bul baıqaýdyń negizgi maqsaty talantty jastardy anyqtaý jáne qoldaý, olardyń shyǵarmashylyq qabiletterin iske asyrýǵa járdemdesý:
- Sol kúni Narhoz ýnıversıtetiniń uıymdastyrýymen «Acoustic evening» aspaptyq konserti ótedi. İs-shara ártúrli stılderdi usynatyn birneshe mýzykalyq nómirlerden turady.
- Sondaı-aq, Asfendıarova atyndaǵy medısınalyq ýnıversıttettiń uıymdastyrýmymen qalamyzdyń stýdentteri arasynda turaqty donorlar sanynyń artýy maqsatynda «Ózgege ómir syıla – donor bol» aksıasy uıymdastyrylady. Mundaı aksıalar bizdiń qalamyzda jaqsy dástúrge aınalýda jáne qatysýshylardyń sany tek artyp kele jatqanyn atap ótken jón.
«Sonymen birge, QR Ǵylym jáne joǵary bilim mınıstri janyndaǵy Stýdentter Keńesiniń otyrysy ótedi. Jalpy maqsaty, mınıstr Saıasat Nurbekpen qazirgi stýdent jastardyń problemasyn talqylaý. Kúni boıy Qazaqstannyń barlyq qalalarynan kelgen stýdentter túrli semınarlar men trenıńterge qatysyp, mınıstrmen TedX alańynda kezdesedi», - dep bólisti J.Jorabek.
Óz sózinde Almaty qalasy boıynsha «Stýdentter alánsynyń» tóraǵasy Jasulan Qýandyq atalǵan is-sharalardan basqa stýdentterge túrli aksıalar men jeńildikter qoljetimdi bolatynyn atap ótti.
«17 qarashada stýdentterge arnaıy jeńildikter men aksıalar qarastyrylady. Bul rette bizdi almatylyq kásipkerler qoldady. Jeńildikter oqý oryndary men tamaqtaný oryndarynda jasalady. Birqatar baspalar bizdiń stýdentterge jeńildikter berýdi josparlap otyr. 15 qarashaǵa deıin biz osy aksıalar týraly tolyq aqparatty jarıalaımyz», - dedi ol.
Jastar men megapolıs stýdentterin Almaty Student Week festıvaline belsendi qatysýǵa shaqyrady.