Almaty qalasy elimizdegi sıfrlyq transformasıanyń aldyńǵy shebinde tur. Bul týraly megapolıs basshysy Darhan Satybaldy Qala kúnine arnalǵan merekede sóılegen sózinde atap ótti.
«Prezıdent Joldaýynda atap ótilgendeı, Qazaqstandy tolyqqandy sıfrlyq memleketke aınaldyrýda Almatynyń róli erekshe. Qazirgi kúni elimizde kórsetiletin IT-qyzmetterdiń jartysynan astamy Almatyda júzege asýda», – dedi shahar basshysy.
Sondaı-aq ol óz jumysynyń basty baǵyttarynyń biri – IT-ınfraqurylymdy damytý, talantty jastardy qoldaý jáne ınovasıalyq jobalardy ilgeriletý ekenin basa aıtty. Darhan Satybaldy sózinde qazirgi tańda shaǵyn jáne orta bıznes salasy qalada 1 mıllıonnan astam turǵyndy jumyspen qamtyp otyrǵanyn, ári osy sektordy qoldaýǵa bıyl 70 mlrd teńgeden astam qarjy bólingenin jetkizdi.
Ákimniń sózine súıensek, óndiristik áleýet te artyp keledi: Almaty ındýstrıalyq aımaǵy men «Alataý» AEA-da júzdegen kásiporyn jumys isteýde. Joǵary suranysqa baılanysty bul aýmaqtar keńeıtilip, ınovasıalyq tehnologıalar ortalyǵyna aınalady.
“Týrızm baǵytynda da jańa jobalar qolǵa alynýda. Aldaǵy ýaqytta iske qosylatyn Almaty taý klasteri halyqaralyq sapa men ekologıa standarttaryna saı qurylyp, Ortalyq Azıadaǵy eń iri tórt maýsymdyq týrısik jobaǵa aınalmaq”, — dedi shahar basshysy.
Almaty ákimdigi turaqty damýdy, kásipkerlikti qoldaýdy jáne qalany halyqaralyq deńgeıdegi básekege qabiletti ortalyq retinde qalyptastyrýdy jalǵastyra beredi.