Almaty qalasynda áleýmettik ınfraqurylymdy jańǵyrtý men damytýǵa aıryqsha kóńil bólinýde, dep habarlaıdy aqshamnews.kz
Bul týraly qala ákimi Darhan Satybaldy Qala kúni merekesinde sóılegen sózinde atap ótti.
“Bıyl ulttyq joba aıasynda 20 jańa mektep paıdalanýǵa berilmek. Sonymen qatar 65 balabaqsha iske qosylady. Bul qadam balalarymyzdyń sapaly bilim alýyna keń múmkindik ashady. Aldaǵy eki jylda densaýlyq saqtaý nysandary tolyq jańǵyrtylyp, qala turǵyndary úshin jańa kópsalaly aýrýhanalar, zamanaýı perzenthanalar men polıklınıkalar salý josparlanǵan”, — dedi Almaty ákimi Darhan Satybaldy.
Ákimniń aıtýynsha, mádenıet pen sport salasy da jańa serpin almaq. “Jaqyn arada 35 myń kórermenge arnalǵan UEFA talaptaryna saı keletin fýtbol stadıonynyń qurylysy bastalady. Qazirgi Ortalyq stadıon jańǵyrtylyp, halyqaralyq standarttarǵa sáıkestendirilmek. Sonymen qatar álemge áıgili «Medeý» kesheni qaıta qurylyp, halyqaralyq deńgeıdegi sporttyq-týrıstik ortalyqqa aınalady. Onyń jyldyq kelýshiler sany 1,5 mıllıon adamǵa deıin jetedi”, — dedi qala basshysy.
Almaty ákimdigi turǵyndarǵa qolaıly jaǵdaı jasaý, sapaly bilim men densaýlyq saqtaý qyzmetin qamtamasyz etý, mádenıet pen sportty damytý baǵytyndaǵy jobalardy júıeli túrde jalǵastyra bermek.