Almaty qalasy boıynsha QR Prezıdenti saılaýynan habar taratý jónindegi baspasóz ortalyǵy alańynda «El erteńi» QQ músheleriniń qatysýymen brıfıń ótti.
Táýelsiz baqylaýshylar saılaý ýchaskelerinde 17.00-degi ýaqyt boıynsha eshqandaıda quqyqbuzýshylyq tirkelmegenin atap ótti. Saıasattanýshy Talǵat Janysbaı azamattardy daýys berýge, saılaý ýchaskelerinde baqylaýshy bolýǵa shaqyrdy.
«Almaty qalasy boıynsha bir aı buryn qoǵam belsendilerin jınaqtadyq, azamattarymyzdy baqylaýshy bolýǵa shaqyrdyq. Búgingi tańda Almaty qalasynda 531 saılaý ýchaskisin tolyq qamtyp otyrmyz. Qazirgi ýaqyttaǵy derekter boıynsha, Almaty qalasynda, basqa óńirlerge qaraǵanda, saılaý prosesi, saılaýshylardyń saılaýǵa barýy tómendeý. Sońǵy aqparattar boıynsha 25% kórsetkish kórsetip tur. Bizde sát saıyn ózimizdiń baqylaýshylarmen baılanysyp, áleýmettik jeliler arqyly jyldam habar almasyp jatyrmyz. Qazirgi tańda barlyq saılaý ýchaskelerinde bir sarynda ótip jatyr. Qazirgi ýaqytta 17.00- de eshqandaıda quqyqbuzýshylyq, zań buzýshylyq faktiler oryn alǵan joq. Sol sebepten bul saılaýdy joǵarǵy deńgeıde jáne ádil ótip jatyr dep aıtýǵa bolady», - deıdi saıasattanýshy, tarıhshy, saıası belsendi Talǵat Janysbaı.
Sondaı-aq, spıkerler jýrnalıserdiń sýraqtaryna jaýap berip, saılaýdyń ereksheligine toqtolyp ótti.
«Halyqtyń saılaýǵa degen qulshynysy, belsendiligi artqan. Saılaýshylar ınstıtýty qalyptasqan. Sondyqtan da basqa saılaýǵa qaraǵanda osy jolǵy saılaý mádenıetiniń artqandyǵymen erekshelenedi. Qazirgi ýaqytta jastardyń arasynda saılaý ádil ótpeıdi degen jańsaq pikirler barshylyq. Bul stereotıpti buzý úshin ózim de táýelsiz baqylaýshy bolýǵa bel baıladym», - deıdi bloger, jýrnalıs Anastasıa Ýlchenko.