Toptyq jarys boıynsha Azıa chempıony Igor Chjan aldaǵy eki maýsymda Álemdik týrda óner kórsetetin qazaqstandyq Astana Qazaqstan Team komandasynyń namysyn qorǵaıdy. Bul týraly Almaty-akshamy.kz Inbusiness.kz-ke silteme jasap habarlaıdy.
23 jastaǵy qazaqstandyq shabandoz elordalyq ujym sapynda úsh aı tájirıbeden ótip, tórt jarysqa qatysqannan keıin "Astanamen" eki jyldyq kelisimshartqa qol qoıdy.
"Men úshin sporttyq mansabymnyń jańa ári óte mańyzdy taraýy bastalady. Árıne, men Astana Qazaqstan Team komandasymen kelisimshartqa otyrǵanyma jáne Álemdik týrda álemniń eń úzdik shabandozdarymen bas qosyp, álemdik velosporttyń joǵarǵy lıgasynda óz elimniń namysyn qorǵaý múmkindigine qol jetkizgenime óte qýanyshtymyn. Oǵan qosa, árıne, bul úlken jaýapkershilik. Óıtkeni alda atqarar jumys kóp. Komanda basshylyǵyna maǵan senim artqany úshin alǵys aıtamyn. Senimdi aqtaýǵa tyrysamyn", - dedi Igor Chjan.
Ulttyq quramanyń namysyn qorǵaıtyn Igor Chjannyń 2022 jylǵy maýsymdaǵy basty jetistigi Azıa chempıonatynyń toptyq jarysynda jeńiske jetýi boldy. Sonymen qatar ol Qazaqstan chempıonatynda "jekeleı ýaqytqa arnalǵan" jarys boıynsha ekinshi oryn ıelenip, bir kúndik "Alaná Gran-prıinde" jeńimpaz atandy, "Sakarıa týrynyń" jalpy esebinde úshinshi orynǵa ıe boldy.
Astana Qazaqstan Team komandasynda tájirıbeden ótý barysynda Chjan úsh kópkúndik jarysqa (Norvegıanyń Arktıkalyq jarysy, Slovakıa týry jáne Langkavı týry) jáne bir kúndik jarysqa (Grand Pemont) qatysty. Osy jarystarda komanda kóshbasshylaryna kómektesýmen qatar, Igor Chjan "Norvegıanyń Arktıkalyq" jarysynyń sheshýshi taýly kezeńinde 9-shy jáne "Slovakıa týrynyń" jalpy esebinde 20-shy nátıje kórsetti.
"Biz birneshe jyl boıy Igor Chjannyń nátıjelerin muqıat qadaǵalap kelemiz. Sońǵy eki jylda shabandoz alǵa jyljyp, tamasha nátıje kórsetti. Sondyqtan onyń bizdiń komandada tájirıbeden ótýi logıkalyq qadam boldy. Igor Astana Qazaqstan Team sapynda baq synaǵan jarystarda ózin laıyqty kórsete bildi. Kóshbasshylarǵa jaqsy qoldaý kórsetti jáne tájirıbe jınaqtady. Birge atqaratyn jumys kóp. Bizdiń komandany jas otandyq shabandozdardy damytýǵa, olarǵa álemdik týrda, álemdik velosporttyń basty lıgasynda ózin kórsetýge múmkindik beretin eń jaqsy oryn dep esepteımin", - dedi Aleksandr Vınokýrov.