Almaty qalalyq PD-nyń bastyǵy Arystanǵanı Zapparov PIK tóraǵalarymen jáne OSI dırektorlarymen kezdesýler ótkizý dástúrin jalǵastyrdy.
Ol mundaı jıyndardyń qaladaǵy zańdylyq pen tártipti qamtamasyz etýdegi joǵary tıimdiligi men kómegin atap ótti, dep habarlaıdy Almaty-akshamy.kz Polisia.kz-ke silteme jasap.
Bul joly syndarly dıalog Medeý aýdanynyń belsendilerimen ótkizildi. Qoǵam belsendilerin túngi ýaqytta oıyn-saýyq mekemelerindegi tynyshtyqty buzý derekteri alańdatady.
«Demalýshylar – basqa álemnen kelgender emes, olar bizdiń azamattarymyz: balalarymyz, kórshilerimiz, baýyrlarymyz. Buǵan ózimiz de belsene qatysýymyz kerek. Sondyqtan jastardy búkil qoǵam bolyp tárbıeleıik. Biz sizdermen birge ǵana tártipti jasaı alamyz», – dedi Arystanǵanı Zapparov.
Sonymen qatar, spıker beınebaqylaý júıelerin jetildirý qajettigin atap ótti.
«Sizder PIK tóraǵalary, OSI dırektorlary bul jumysty uıymdastyrýǵa mindettisizder. Kireberisterde kameralar bar. Bul kameralar 10 jyl buryn ornatylǵan. Qojaıynnan: “Jańartý bola ma?” dep sizder suraýlaryńyz kerek emes pe»? – dedi Almaty qalasynyń bas polıseıi.
PIK jáne OSI tóraǵalary óz kezeginde, mundaı jumys kezdesýleri ózderine senip tapsyrylǵan aımaqtyń kúndelikti ómirine oń áser etetinine senim bildirdi.
«Bizdiń "Alataý" yqshamaýdany qalanyń shet jaǵynda ornalasqandyqtan, qalaǵa tez jetip, birdeńeni habarlaý óte qıyn. Bizdiń ýchaskelik polısıa qyzmetkerleri bizben táýlik boıy jumys isteıdi, olar kúndelikti baılanysta. Úlken raqmet. Biz óte rızamyz. Halyqqa mundaı kezdesýler qajet: biz zańnamadaǵy keıbir jańalyqtardy bilip, ótinishterdi qarap, ony basqa turǵyndarǵa jetkize alamyz», – dep atap ótti “Alataý aktıv” PIK tóraǵasy Tatána Abajeı.