Óńirlik komýnıkasıalar qyzmetiniń brıfıńinde EAEO elderinen kelgen sheteldik azamattar men eńbek mıgranttary Almatydaǵy emhanaǵa qalaı tirkelip, qalaı medısınalyq kómek ala alatyny jóninde aıtyldy, dep habarlaıdy Almaty-akshamy.kz.
Respýblıkalyq elektrondy densaýlyq saqtaý ortalyǵynyń Almaty qalalyq fılıalynyń dırektory Gúlnár Ysqaqova Qazaqstanda 15 qazanda alǵashqy medısınalyq-sanıtarlyq kómek uıymdaryna erkin tańdaý arqyly jyl saıynǵy tirkelý naýqany bastalǵanyn jáne ol 15 qarashaǵa deıin jalǵasatynyn aıtty.
«Búginde Almatyda alǵashqy medısınalyq-sanıtarlyq kómekti 73 alǵashqy medısınalyq-sanıtarlyq kómek uıymy kórsetedi, onyń 40-y memlekettik, qalǵany jekemenshik. Búgingi tańda 6 jańa tapsyrys jetkizýshi alǵashqy medısınalyq-sanıtarlyq kómek kórsetýge jáne tirkeýge nıet bildirdi», - dedi G.Ysqaqova
Tirkelýdiń úsh múmkindigi bar: tirkelý naýqany aıasynda, erkin tańdaý jáne qonys aýdarýǵa baılanysty. G.Ysqaqova qajet bolǵan jaǵdaıda ýchaskelik dáriger sizge kómektesip, úıde baqylap otyrýy úshin turaqty turǵylyqty jerde ornalasqan emhanany tańdaýdy usynady.
Sondaı-aq ol ótken jyldyń 15 tamyzynan bastap sheteldikter men eńbek mıgranttary úshin alǵashqy medısınalyq-sanıtarlyq kómek kórsetetin uıymdarǵa tirkelý erejeleri ózgergenin aıtty. Endi olarda erikti medısınalyq saqtandyrý sharty bolýy kerek.
«Eger shetel azamaty Qazaqstan Respýblıkasynyń aýmaǵynda turaqty turatyn bolsa nemese turýǵa yqtıarhaty bolsa, ol mindetti medısınalyq saqtandyrý júıesi jáne medısınalyq kómektiń kepildik berilgen kólemi boıynsha kómek alýǵa quqyly. Búgingi tańda Almaty qalasynyń emhanalaryna 22 myńnan astam shetel azamaty tirkelgen. Olardyń ishinde Reseı Federasıasynyń 5 myńnan astam azamaty bar», - dedi G.Ysqaqova.
Almaty qalalyq qoǵamdyq densaýlyq saqtaý departamenti emdeý-profılaktıkalyq is-sharalar bóliminiń basshysy Láılá Imanǵalıeva naýqan barysynda alǵashqy medısınalyq-saraptamalyq kómek uıymyna tirkelgen azamattar ol arqyly tek 2023 jyldyń 1 qańtarynan bastap medısınalyq kómek ala bastaıtynyn aıtty. Iaǵnı, 31 jeltoqsanǵa deıin olarǵa buǵan deıin tirkelgen emhanada qyzmet kórsetý jalǵasady.