Byltyrdan beri tolyqqandy júzege asyryla bastaǵan «Adal azamat» baǵdarlamasynyń negizinde qaladaǵy №59 mektep-gımnazıasynda «Adal adam – Adal eńbek – Adal tabys» taqyrybynda qundylyqqa negizdelgen tásilder aılyǵy uıymdastyryldy.
Aılyq jospary boıynsha mekteptiń barlyq birlestigi úsh kezeńge bólinip, ár kezeńde ártúrli jobalar iske asyryldy. Olar ádildik, jaýapkershilik, zań jáne tártip, birlik jáne yntymaq, eńbekqorlyq jáne kásibı biliktilik, jasampazdyq jáne jańashyldyq sıaqty qundylyqtardy damytýǵa baǵyttaldy.
Qazaq tili men ádebıeti pánder birlestigi táýelsizdik jáne otanshyldyq qundylyqtaryn júzege asyrý maqsatynda birqatar tárbıelik is-shara ótkizdi. Máselen, «Balalar kitaphanasy» jobasy aıasynda 5-synyp oqýshylary «Er Tóstik – el qorǵaǵan er» taqyrybynda kórkem oqý men teatrlandyrylǵan qoıylym usyndy. Bul qoıylym arqyly jetkinshekter ádebı keıipkerlerdi tanyp, el qorǵaý men adaldyq uǵymdaryn tereńirek uǵyndy.
Joǵary synyp oqýshylary táýelsizdik taqyrybyndaǵy shyǵarmalar boıynsha býktreıler jasap, shyǵarmashylyq qabiletin kórsetti. Sonymen qatar, «Táýelsizdik jyldaryndaǵy shyǵarmalardaǵy adaldyq taqyryby» atty jas jazýshylarmen kezdesý uıymdastyryldy. Bul oqýshylardyń ádebıetke degen qyzyǵýshylyǵyn arttyryp, erkin oı almasýǵa múmkindik berdi.
«Aılyq aıasynda «Qundylyq bastaýy – halyq aýyz ádebıeti» atty komıkster kórmesi de uıymdastyrylyp, ulttyq mura zamanaýı formatta usynyldy. Mahambet Ótemisuly shyǵarmalary boıynsha ótken kýız batl oqýshylardyń bilimin shyńdap, rýhyn kóterdi. Kitap kórmesi arqyly jas urpaqtyń kitapqa degen qyzyǵýshylyǵyn arttyrýǵa baǵyttalǵan is-sharalar da sátti uıymdastyryldy. Mundaı taǵylymdy jobalar jas urpaqty sanaly, jaýapkershiligi joǵary tulǵa retinde tárbıeleýdiń mańyzdy qadamy ekeni sózsiz», – deıdi №59 mektep-gımnazıasy dırektorynyń oqý isi jónindegi orynbasary Kamshat Egeýbaeva.
