Ekijaqty yntymaqtastyq jaıly sóz boldy.
Almaty oblysynyń ákimi Marat Sultanǵazıev EIB ókilderimen kezdesý barysynda Qonaev qalasynyń túrli salalardaǵy jobasy boıynsha ekijaqty yntymaqtastyq jaıly aıtty, dep habarlaıdy Almaty-akshamy.kz.
«Almaty oblysy kez kelgen salany damytýǵa yńǵaıly óńir. Onyń ishinde, áleýmettik sala, ınfraqurylym, logıstıka, balyq, mal, egin sharýashylyǵy, balama energıa kózi salalary bar. Aıta keterligi, aımaqta et eksportynan góri balyq eksporty jaqsy damyp keledi», – dedi jıyn barysynda Marat Sultanǵazıev.
Qonaev qalasyn IT mamandarynyń shoǵyrlanǵan, ónerkásibi damyǵan, taza ekologıalyq qala etý úshin túrli jobalar jasalyp jatyr. Jáne tıisti mamandar shetel ınvestorlarymen únemi kezdesý ótkizip otyrady.
«Eýropalyq ınvestısıa bankiniń (EIB) kúsh-jigeri 4 salaǵa baǵyttalǵan: ınovasıalardy qoldaý; shaǵyn bıznesti damytý; klımatty qorǵaý; ınfraqurylym obektilerin qurý. EIB memlekettik jáne jeke sektorǵa, onyń ishinde ınovasıalyq startaptardy qarjylandyrý úshin kredıtter beredi. Shaǵyn jáne orta bızneske (SHOB) ádette jergilikti bankter arqyly qoldaý kórsetiledi. Bul rette, ortasha kólemdi kompanıalar EIB-ten ǵylymı-zertteý salasy men damýǵa ınvestısıalar retinde tikeleı qoldaý ala alady. Orta eseppen, EIB nesıesi jeke ınvestorlar men memlekettik qarjy mekemeleriniń qarajatyn tartýǵa jumys isteýge múddeli», – dedi EIB-niń memlekettik mekemelermen jumysyn damytý bóliminiń mamany Adam Brýýn.
Adam Brýýnnyń aıtýyna qaraǵanda, EO Keńesiniń (1999 j. 22 jeltoqsandaǵy 2000/24/EO) sheshimine sáıkes EIB EO elderinde jáne shetelde, onyń ishinde Azıada jobalardy qarjylandyrý boıynsha kredıttik operasıalardy júrgizýge mandatqa ıe. Bul bank 2 jyldan 6 jylǵa deıingi jeńildikti kezeńimen 7 jyldan 20 jylǵa deıingi merzimge nesıe beredi.
«İri aýqymdy jobalardy júzege asyrý úshin bankke EO búdjetinen kepildik qajet. Sondyqtan EIB operasıalaryn damýshy elderge taratý týraly máseleni sheshýge EO basshylyǵynyń saıası sheshimi kerek. EIB jeńildetilgen orta jáne uzaq merzimdi negizde, eń aldymen kólik, ınfraqurylym, energetıka, qorshaǵan ortany qorǵaý salasynda jobanyń jalpy ınvestısıalyq qunynyń 50% aspaıtyn mólsherde kredıtter bere alady», – dedi Adam Brýýn óz sózinde.
EIB-niń jeke sektordy qarjylandyrýǵa jaýap beretin mamany Jan-Jak Sýlakrý bolsa kez kelgen bastamaǵa baılanysty ortaq sheshimge kelýge daıyn ekenin, dese de, týrızm salasyna qarjy bóle almaıtyndaryn kesip aıtty.
Kezdesý sońynda oblys ákimi Marat Sultanǵazıev aımaqqa ınvestısıa quıýǵa nıetti kompanıalardyń kóp ekenin atap ótip, yntymaqtastyq ekijaqty emes, úshjaqty bolýy da múmkin eken jetkizdi.