Qujat qabyldaý taǵy úsh kúnge uzartyldy.
Oqý-aǵartý mınıstrligi «Úzdik pedagog-2022» baıqaýynyń birinshi kezeńine qatysý úshin qujat qabyldaý taǵy úsh kúnge uzartylǵanyn aıtty, dep habarlaıdy Almaty-akshamy.kz
Orta bilim komıtetiniń tóraǵasy Gúlmıra Kárimovanyń aıtýynsha, búginde teachercontest veb-portalynda tirkelgen úmitkerler sany 4,4 myńnan asty. Baıqaýǵa qatysamyn deýshiler kóp.
«Bıyl baıqaýǵa qatysýǵa nıet bildirgenderdiń kóptigin kórip otyrmyz. Sol sebepti konkýrsqa qujat qabyldaýdy 25 qyrkúıekke deıin, ekinshi kezeńge qatysý úshin 2022 jyldyń 30 qyrkúıegine deıin uzarttyq. Konkýrsty ótkizý tarıhynda alǵash ret elektrondy formatta ótkizip otyrmyz. Bul qatysýshylarǵa baıqaýdyń ár kezeńin baqylap otyrýǵa múmkindik beredi. Qazir baıqaýdyń úsh kezeńi de avtomattandyrylǵan», - dedi ol.
Aıta keteri, baıqaýǵa qujat qabyldaý bıyl 12 qyrkúıekte bastalǵan bolatyn. Oǵan balabaqsha, mektep pen kolej muǵalimderi qatysa alady. teachercontest veb-portaly arqyly ótinim berýge, konkýrs qujattamasyn júktep alýǵa jáne barlyq kezeńdegi upaılardy baqylaýǵa bolady.
«Úzdik pedagog» ataǵynyń ıegerlerine 3 mıllıon teńge kólemindegi aqshalaı syıaqy jáne arnaıy tósbelgi tabystalady. Baıqaý erejeleri týraly qosymsha aqparat mınıstrliktiń resmı saıtynan tabýǵa bolady.