Energetıka mınıstrliginiń málimetinshe, óńirge dızeldiń qosymsha kólemi jóneltiledi.
Almaty oblysyndaǵy dızel tapshylyǵyna baılanysty Energetıka mınıstrligi «QazMunaıGaz», «Petrosun» JQS jelileri ókilderiniń qatysýymen keńes ótkizdi, dep habaraıdy Almaty-akshamy.kz.
Mınıstrlikten málimdegendeı, qazir Almaty oblysyndaǵy dızel otynynyń qory 11 myń tonnadan asady. Janarmaı quıý stansıalarynyń (JQS) dereginshe, búginde bar dızel kólemi qajettilikti jabý úshin jetkilikti.
Alaıda, JQS jelileriniń aqparaty boıynsha búgin dızel otynyna degen suranys 30% astam mólsherge artqan. Saldarynan keıbir janarmaı quıý beketterinde otynnyń táýliktik kólemi tez taýsylǵan.
Energetıka mınıstrliginiń málimetinshe, óńirge dızeldiń qosymsha kólemi jóneltiledi.
«Sondyqtan jeliler basshylyǵy otyndy kóp tutynatyn aýdandarǵa tıep-jóneltýdi arttyrý týraly sheshim qabyldady. Sonymen qatar Atyraý munaı óńdeý zaýyty jáne Pavlodar munaı-hımıa zaýytynan 5 000 tonna otyn jóneltildi. «Qazaqstan temirjoly kompanıasy» ýaqtyly tasymaldaýdy qamtamasyz etedi», - delingen mınıstrliktiń saıtynda jarıalanǵan habarlamada.
Buǵan deıin Shymkent munaı óńdeý zaýyty jóndeý jumystaryna baılanysty jabylǵan edi. Degenmen ol búgin jumysyn qaıta bastady. Atalǵan zaýytta óńdelgen munaı ónimderiniń alǵashqy legi demalys kúnderi jóneltiledi.
«Bul rette Almaty oblysyn qosa alǵanda, ońtústik óńirlerge birinshi kezekte jóneltý qamtamasyz etiledi. Sondaı-aq Almaty oblysynyń aýyl sharýashylyǵy taýaryn óndirýshilerine qosymsha 3 myń tonna dızel otyny bólinetin bolady», - dep málim etti vedomstvodan.