Almaty oblysynda eki adamnyń ólimimen aıaqtalǵan jol apaty tergelip jatyr, dep habarlaıdy Aqshamnews tilshisi.
Almaty oblystyq polısıa departamentiniń málimetinshe, «Almaty – Óskemen» avtojolynyń 94-shaqyrymynda bolǵan jol-kólik oqıǵasy boıynsha qylmystyq is tirkelgen.
Aldyn ala derekterge sáıkes, Changan kóliginiń júrgizýshisi rólge ıe bola almaı, ózimen bir baǵytta kele jatqan júk kóliginiń tirkemesine soqtyǵysqan. Soqqydan keıin kólik ınersıamen jol jıegindegi qorshaýǵa soǵylǵan.
«Artynsha Toyota Estima kóligi Changan-ǵa soǵylyp, keıin ınersıamen jol jıeginde turǵan tirkemege soqtyǵysqan. Sonymen qatar, soqqy saldarynan Changan kóliginiń qozǵaltqyshy qarsy jolaqqa ushyp, sol jerde kele jatqan Ford Focus avtokóligimen janasqan. Jol apatynyń nátıjesinde Changan-daǵy eki jolaýshy oqıǵa ornynda kóz jumdy. Al atalǵan kóliktiń júrgizýshisi men Toyota Estima júrgizýshisi túrli jaraqattarmen medısınalyq mekemege jetkizildi. Qazir oqıǵanyń barlyq mán-jaıyn anyqtaý úshin jan-jaqty, tolyq ári obektıvti tergeý júrip jatyr», — delingen polısıa málimdemesinde.