Almaty oblysynyń ákimi Marat Sultanǵazıev Úkimet otyrysynda óńirde jańa jumys oryndaryn ashý boıynsha qabyldanyp jatqan sharalar týraly baıandady. Ol óńirde tirkelgen jumyssyzdar sany azaıǵanyn atap ótti, dep habarlaıdy aqshamnews.kz
Jumys oryndaryn qurý Óńirlik jumys oryndaryn qurý kartasy jáne ınvestısıalyq jobalar sheńberinde qamtamasyz etilýi josparlanýda.
Investısıalyq navıgatorda somasy 1,7 trln teńgeni quraıtyn 73 joba tirkelgen, olar boıynsha 21 myń jumys ornyn ashý kózdelgen. Óńirlik karta aıasynda «Jaıly mektep» jobasyn júzege asyrý barysynda 2820 turaqty jumys orny qurylady. «Shaǵyn jáne orta kásipkerlikti damytý tujyrymdamasy» aıasynda 450 astam jumys orny ashylady.
«Absolútti kórsetkishterdi ǵana emes, jalpy jumys kúshindegi jumyssyzdyqtyń úlesin de eskerý mańyzdy. Ótken jylmen salystyrǵanda jumyssyzdyq deńgeıi 4,7%-dan 4,6%-ǵa tómendedi»,
— dedi Marat Sultanǵazıev. Ákim jumyssyzdar boıynsha jumys naryqtyń qajettiligine nazar aýdara otyryp júrgizilip jatqanyn aıtty. Kásibı oqytý arqyly 800-den astam jumyssyz turaqty jumys oryndaryna ornalastyrylatyn bolady. Negizgi bóligi tájirıbe arqyly daǵdylardy meńgere otyryp, kásiporyndar janynda oqytylýda. Sonymen qatar onlaın-oqytýdan 5,2 myń adam ótip, jańa quzyretterge ıelendi. Eńbek salasyndaǵy tıimdilikti arttyrý úshin birqatar Sıfrlyq jobalar iske asyrylýda. Stýdentterge tájirıbe oryndaryn irikteýge jáne jumys berýshilerge úmitkerlerdi avtomatty túrde tańdaýǵa arnalǵan «Ódiristik tájirıbe» sıfrlyq servısi sátti jumys isteýde. «Mansap kompasy» jáne «Enbek.kz» quraldary belsendi júzege asyrylýda.