Bul qyzmetkerler Taldyqorǵan qalasyndaǵy tergeý ızolátoryna jasalǵan shabýyl kezinde jaraqattanǵan.
Elimizde bolǵan qańtar oqıǵasyna baılanysty, jastar arasynda jaýyngerlik rýhyn kóterý, patrıottyq tárbıe berý maqsatynda Taldyqorǵan qalalyq 16 orta mektebi basshylyǵy QAJ qyzmetkerlerimen kezdesý uıymdastyrdy, dep habarlaıdy Almaty-akshamy.kz Polisia.kz-ke silteme jasap.
Oqýshylarmen kezdesýdiń basty qonaqtary retinde Almaty oblysy boıynsha QAJ departamentine qarasty LA-155/16 mekemesiniń qańtar oqıǵalarynda jaraqat alǵan qyzmetkerleri Maýlen Myrzabekov jáne Dıdar Baıbosynov qatysty. Tárbıe saǵaty Ánuranmen jáne qaqtyǵys kezinde qaza tapqan qyzmetkerlerdi eske alý maqsatymen únsizdikpen bastaldy. Kezdesý barysynda QAJ qyzmetkerleri oqýshylarǵa elimizge qyzmet etýdiń basty qundylyqtaryn túsindirip, qoıylǵan suraqtarǵa jaýap berdi.
«Erlik – tabıǵattyń syıy emes, sanaly áskerı tárbıeniń jemisi, Otan aldyndaǵy paryzyńdy oryndaý úshin ózińdi sanaly túrde qaýip-qaterge bas tigýge daıyn bolýdyń nátıjesi. Bizdiń maqsatymyz – elimizge qyzmet etýmen qatar, jas urpaqtyń Otanǵa degen patrıottyq sezimderin arttyrý», – dep atap ótti Almaty oblysy boıynsha QAJD bastyǵynyń orynbasary Jánibek Qosjanov.
Jıyn sońynda mektep basshylyǵy jáne oqýshylar QAJ qyzmetkerlerine alǵystaryn aıtyp, jyly lebizderin bildirdi.