İle-Alataý ulttyq parkinde 2 524 metr bıiktikte ornalasqan Fýrmanov shyńynyń etegindegi ataqty átkenshektiń qaıta jańǵyrtý jumystary aıaqtaldy. Bul nysan uzaq jyl boıy Almaty turǵyndary men týrıseri úshin taýdaǵy eń tanymal orynnyń biri retinde jaqsy tanys.
Jańǵyrtý jumystary týrızm salasyndaǵy ulttyq joba aıasynda júrgizildi. Basty maqsat – qaýipsizdik pen qolaılylyqty arttyrý, sondaı-aq átkenshekti erekshe etetin atmosferany saqtaý arqyly taýdaǵy demalystyń jáne jarqyn áserdiń alańyna aınaldyrý.
«Jumys barysynda tireýishter kúsheıtilip, zamanaýı vandalǵa tózimdi ári ekologıalyq materıaldar qoldanylyp qaıta qurastyryldy. 500 kelige deıingi salmaq kótere alatyn jańa oryndyqtar ornatyldy. Sonymen qatar aýmaq abattandyryldy: jańa oryndyqtar men qosymsha demalys elementteri ornatyldy. Tabıǵı landshaftpen úılesetin shaǵyn sáýlet nysandary paıda boldy», – dep habarlady Almaty qalasynyń Týrızm basqarmasy.
Jańǵyrtýdan keıin átkenshek qaıtadan almatylyqtar men qala qonaqtarynyń ıgiligine berildi.
Jańartylǵan nysan burynǵydaı atmosferasy men tartymdylyǵyn saqtap qana qoımaı, taýdaǵy demalysqa barynsha yńǵaıly, senimdi ári qaýipsiz orynǵa aınaldy. Nysanǵa kelgen qonaqtarǵa taýda abaı bolýdy jáne qurylysqa uqypty qaraýdy usynamyz.
Aıta keteıik, átkenshekterdi jańartý jumystary Almaty taý klasterin damytýǵa baǵyttalǵan keshendi sharalardyń bir parasy. Joba qala turǵyndary men qonaqtary úshin taý baǵyttarynyń tartymdylyǵyn saqtaýǵa negizdelgen.