Almaty ınjenerlik-kommýnıkasıalyq ınfraqurylymdy jan-jaqty jańartýdy qolǵa alyp, jylý, elektr, sý qubyry men káriz jelisin qaıta jańǵyrtyp, strategıalyq mańyzy bar sý qabyldaý nysandaryn sala bastady. Óńirlik komýnıkasıalar qyzmetinde qala ákiminiń orynbasary Almasqan Smatlaev osylaı dep, qaladaǵy júıelerdiń turaqtylyǵyn arttyryp, qysqy kezeńge qamdaný úshin bıyl biraz jumys bitkenin atap ótti.
Almasqan Smatlaevtyń aıtýynsha, bıyl 39 shaqyrym jylý jelisi men 17 qazandyq qaıta jańǵyrtylǵan. Bul jylý jelileriniń tozýyn 56,1%-dan 54,3%-ǵa, qazandyqtardyń tozýyn 65,1%-dan 62,1%-ǵa tómendetýge múmkindik berdi. Elektr jelisin de qatar jańartyp jatyr: 221 shaqyrym jeli jańaryp, jyl sońyna deıin bul kórsetkish 238 shaqyrymǵa jetpek.
330,7 shaqyrym sý qubyry da salynyp, 60 shaqyrymy jańǵyrǵan. Sonyń arqasynda qubyrdyń tozýy byltyrǵy 53,8%-ben salystyrǵanda 51%-ǵa tómendedi. Sý burý júıesinde 306,4 shaqyrym káriz jelisi salynyp, 5,5 shaqyrymy jańardy, bul da tozý deńgeıin 49,5%-ǵa tómendetip otyr.
Ákimniń orynbasary jańa sý qabyldaý nysandaryn salýǵa erekshe toqtaldy. Onyń aıtýynsha, «Aksaı» sý qabyldaǵyshy 95%-ǵa daıyn, ol batys pen taýǵa irgeles aýdandardaǵy shamamen 140 myń turǵyndy sýmen qamtamasyz etedi. Jaýyn-shashyndy kezeńdegi iske qosý-retteý jumysy aıaqtalǵannan keıin, nysandy 2026 jyldyń mamyr aıyna taman iske qospaq oıda. «Ermensaı» sý qabyldaǵyshy 2026 jyldyń qarashasynda aıaqtalyp, Bostandyq aýdanynyń ońtústik-shyǵys bóligin sýmen qamtıtyn bolady.
Apattyq jaǵdaıǵa qatysty pikirinde Smatlaev 13 qarashada Alataý aýdanyndaǵy jaryqtyń óship qalǵanyn da mysalǵa keltirdi. Gaz qubyryn tóseý kezinde merdiger 110 kV kabeldi zaqymdap, 32 myńnan astam adam jaryqsyz qalǵan. Alaıda apat bir táýlikte tolyq joıylyp, 64 mln teńge kólemindegi shyǵyndy kináli uıym óteıtin bolyp uıǵaryldy.
Ákimniń orynbasary merdigerlerge baqylaý kúsheıip jatqanyn atap ótti: biraz kompanıanyń lısenzıasy qaıtaryp alyndy, sotqa 30 talap-aryz daıyndalyp, endi barlyǵyn salalyq basqarmalarmen kelisip istemekshi.
«Biz jumystyń sapasy men merzimin qamtamasyz ete alatyn myqty, tártipti merdigerler pýlyn qalyptastyryp jatyrmyz. Almatynyń ınfraqurylymy senimdi ári kelesi ondaǵan jylǵa eseptelgen bolýy tıis», – deıdi Alıhan Smatlaev.