Almatynyń ındýstrıalyq aımaǵy turaqty damý baǵytynda mańyzdy qadam jasady. Kompanıa 2023 jylǵy 4 jeltoqsannan bastap (UN Global Compact) tolyqqandy qatysýshy bolyp, Qazaqstanda aýqymdy bastamaǵa qosylǵan alǵashqy ındýstrıalyq aımaq atandy, dep habarlaıdy almaty-akshamy.kz
Almaty ındýstrıalyq aımaǵy adam quqyqtary, qorshaǵan ortany qorǵaý, eńbek qatynastary jáne sybaılas jemqorlyqqa qarsy kúres salasyndaǵy ornyqty damý qaǵıdattary men qundylyqtaryn saqtaýǵa mindetteme alyp, bıyl qazanda BUU Jahandyq shartyna qosylǵan «Almaty» ÁKK-niń ortaq kelisilgen damý strategıasyna beıildiligin bildirdi.
«Almaty ındýstrıalyq aımaǵy» JSHS adam quqyqtaryna, eńbekke, qorshaǵan ortaǵa jáne sybaılas jemqorlyqqa qarsy kúreske qatysty BUU Jahandyq shartynyń on qaǵıdatyn qoldaıdy. Biz osy qaǵıdattardy ilgeriletetin Jahandyq shartty qoldaýǵa nıet bildiremiz», - dedi «Almaty ındýstrıalyq aımaǵy» JSHS dırektory Álisher Satybaldıev.
Birikken Ulttar Uıymynyń kóp jyldyq tájirıbesine, bedeli men múmkindikterine súıenip, Jahandyq shart kompanıaǵa birqatar praktıkalyq artyqshylyqqa, atap aıtqanda tujyrymdamalyq ázirlemelerge qol jetkizýge, ınovasıalyq ádistermen almasýǵa, qorshaǵan ortany qorǵaý, áleýmettik damý jáne memlekettik basqarý jónindegi jobalardy iske asyrýda BUU qurylymdaryn qoldaýdy paıdalanýǵa qol jetkizip, qyzmetin jarıa jáne ashyq etýge múmkindik beredi.
Ózine qabyldanǵan mindettemeler aıasynda Almatynyń ındýstrıalyq aımaǵy jyl saıyn BUU-nyń Jahandyq shartynyń qaǵıdattaryn saqtaý salasyndaǵy jumysynyń nátıjesi týraly esepti usynady.
Aıta keteıik, BUU-nyń Jahandyq sharty korporatıvtik áleýmettik jaýapkershilik jáne turaqty damý salasyndaǵy álemdegi eń iri erikti bastama. Búginde ol álemniń 167 elindegi 23 myńnan astam qatysýshynyń basyn qosyp otyr.