Ekonomıkalyq yntymaqtastyq jáne damý uıymy (EYDU) Bilim alýshylardy baǵalaý jónindegi PISA-2022 halyqaralyq baǵdarlamasynyń nátıjelerin jarıalady, dep habarlaıdy Almaty-akshamy.kz.
Onda 81 memleketten qatysqan 15 jastaǵy bilim alýshylardyń matematıkalyq, oqý jáne jaratylystaný saýattylyǵynyń deńgeıi baǵalandy. Bul týraly QR Oqý-aǵartý mınıstri habarlady.
Qazaqstandyq oqýshylar jaratylystaný páni boıynsha óz kórsetkishterin 26 upaıǵa kóterdi. Sol arqyly qatysýshy memleketter arasynda eń joǵary ósimge qol jetkizdi jáne matematıka men oqý kórsetkishterin EYDU-nyń segiz elimen birdeı deńgeıde saqtap qaldy. Bul Qazaqstannyń matematıka jáne jaratylystaný boıynsha TOP-50 eldiń ishine kirýine múmkindik berdi.
Qazaqstan 81 eldiń ishinde matematıkadan 46-shy (2018 j. 54-oryn), oqýdan 61-shi oryn (2018 j. 69-shy), jaratylystaný páni boıynsha 49-shy oryndy (2018 j. 69-shy) ıelendi.
Aıta ketý kerek, PISA-2022 nátıjeleri boıynsha elimizdegi qala men aýyldyq jerlerdegi oqýshylar arasyndaǵy bilim sapasynyń alshaqtyǵy azaıǵany baıqalady. Oqý-aǵartý mınıstri Ǵanı Beısembaevtyń aıtýynsha, otandyq bilim salasynyń damýy birqatar faktorlarǵa baılanysty.
«Memleket basshysynyń bilim berý júıesine úzdiksiz kórsetip kele jatqan jan-jaqty qoldaýynyń arqasynda osyndaı kórsetkishterge qol jetkizildi. Pedagog mártebesin arttyrý, jalaqyny kóbeıtý, qosymsha bilim berýdi, ınfraqurylymdy damytý, balalarymyz úshin qaýipsiz jáne jaıly ortany qamtamasyz etý sharalary bilim sapasyn arttyrýǵa tikeleı áser etedi. Bilim salasyn damytýdaǵy memlekettik ustanymnyń durystyǵy aıqyndaldy. Osy baǵyttaǵy jumysty kúsheıte túsken jón», - dedi mınıstr.
Aıta ketý kerek, Oqý-aǵartý mınıstrligi halyqaralyq tájirıbeni eskere otyryp, bilim berý sapasyn odan ári arttyrý úshin 5 negizgi baǵyt boıynsha júıeli jumystar júrgizýde. Atap aıtsaq, "Bilim berýdegi ózgeristerdiń 1000 kóshbasshysy" kadrlyq rezervin qalyptastyrý jáne menedjmentti nyǵaıtý; 21 ǵasyrdaǵy daǵdylar men quzyretterdi damytý úshin oqý baǵdarlamalaryn jańartý, aýyl mektepterin qoldaý jónindegi keshendi baǵdarlamany iske asyrý; Daıyndyq tásilderin jetildirý, pedagogterdi qaıta daıarlaý jáne biliktiligin arttyrý; "Jaıly mektep" ulttyq jobasy sheńberinde jańa mektepter salý, qalǵan bilim oshaqtaryn jańǵyrtý, ınfraqurylymyn damytý; Sapany baǵalaýdyń ulttyq júıesin transformasıalaý. Bul sharalardyń barlyǵy bıyl Úkimet qaýlysymen bekitilgen «Mektepke deıingi, orta, tehnıkalyq jáne kásiptik bilim berýdi damytýdyń 2023-2029 jyldarǵa arnalǵan tujyrymdamasynda» qamtylǵan.