«Almaty Business – 2025» óńirlik kásipkerlikti qoldaý baǵdarlamasy aıasynda «Almaty» ÁKK» AQ enshiles uıymy «Almaty Finance» JSHS «KELET Machine-Building Plant» JSHS-ne elimizde tuńǵysh ret qubyrly elektr jylytqyshtar óndirisin iske qosý úshin 500 mln teńge kóleminde qarjy bóldi. Qaryzdyń syıaqy mólsherlemesi jylyna 6% (JTSM), nesıeleý merzimi - 5 jyl.
Kompanıa óz qarjysy esebinen Jetisý aýdanyndaǵy óndiristik korpýsty kúrdeli jóndeýden ótkizip, bıznes-jospar ázirledi. Qaryzǵa alynǵan qarajat ónimderdiń betin daıyndap, untaqty boıaý jáne keptirý jumystaryna arnalǵan ıtalándyq qondyrǵyny jáne boıaý jelisin satyp alýǵa jumsalady.
Óndiristi jańǵyrtý «KELET» AQ-nyń enshiles kásipornyna Qazaqstandaǵy iri mashına jasaý zaýyttarynyń birine jylyna 1 mln danaǵa deıin qubyrly elektr jylytqyshtardy jappaı shyǵarýǵa múmkindik beredi. Joba otandyq óndiris kólemin arttyryp, ımportqa táýeldilikti azaıtyp, energıa únemdeıtin jabdyq túrlerin kóbeıtýge jáne eksporttyq áleýetti nyǵaıtýǵa jol ashady.
Jańa óndiristik jelini iske qosýmen qatar, qoldanystaǵy boıaý jelisi de jańǵyrtylady. Bul jańartý tústerdi aýystyrý ýaqytyn qysqartyp, boıaý shyǵynyn azaıtyp, sý jylytqyshtar, kalorıferler, elektr konvektorlary men gaz qazandyqtaryn shyǵarý qarqynyn arttyrýǵa septigin tıgizedi.
«Jobany iske asyrý arqyly energıa únemdeıtin jabdyqtar segmentindegi otandyq ónimniń úlesi artyp, 20 turaqty jumys orny ashylady jáne aldaǵy 5 jylda búdjetke 800 mln teńgeden astam salyq túsimin qamtamasyz etedi», — dedi «Almaty Finance» JSHS Basqarma tóraǵasy Berik Qusaıynov.
Óndiris kelesi jyldyń naýryz aıynda iske qosylady dep josparlanyp otyr.