Elimiz boıynsha aýasy las 10 qala ataldy
QR Ekologıa, geologıa jáne tabıǵı resýrstar mınıstrligi Ekologıalyq retteý jáne baqylaý komıtetiniń tóraǵasy Zulfuhar Joldasov elimiz boıynsha lastaný deńgeıi joǵary qalalardy atady, dep habarlaıdy Almaty-akshamy.kz QazAqparat saıtyna silteme jasap.
«Memleket basshysy Qazaqstan halqyna Joldaýynda elimizdegi ekologıalyq problemalarǵa, ásirese, aýa sapasyna basa nazar aýdarýdy tapsyrdy. Osy oraıda neǵurlym lastanǵan 10 qalany gazdandyrý jáne balamaly energıa kózderine kóshirý qajet. Qazgıdromettiń ekologıalyq monıtorıńine sáıkes, ótken jyldyń qorytyndysy boıynsha 45 ónerkásibi bar 10 qala atmosferalyq aýanyń joǵary lastaný deńgeıine jatatyny kórsetildi. Bul Nur-Sultan, Almaty, Qaraǵandy, Temirtaý, Atyraý, Aqtóbe, Balqash, Óskemen, Jezqazǵan jáne Shymkent qalasy», - dedi Z. Joldasov.
Sonymen qatar komıtet basshysy respýblıkalyq mańyzy bar qalalardaǵy aýanyń lastaný saldaryn atap berdi. Onyń aıtýynsha, Almaty men Nur-Sultan sıaqty iri qalalarda lastanýdyń negizgi paıyzy jylý kózderine (qazandyqtar), avtokólik pen jeke sektorlarǵa tıesili. Óskemen jáne Temirtaý qalasynda aýa kóbine kóp ónerkásip oryndary esebinen lastanady. Al Aqtóbe jáne Atyraý qalasy boıynsha eskirgen káriz júıesi aýanyń lastanýyna ákelip otyrǵan kórinedi.