Álemdik pop-juldyzy Djennıfer Lopestiń Almatydaǵy konserti 10 tamyz kúni ótedi. Mýzykalyq keshti joǵary deńgeıde ótkizýge qalanyń Ortalyq stadıony barlyq jaǵynan daıyn. Qaýipsizdik sharalary kúsheıtilip, ınfraqurylym tolyq jańǵyrtyldy. Trıbýnalar jóndelip, baspaldaqtar jańartylyp, oryndyqtar aýystyryldy.
Stadıon aýmaǵynda júrip jatqan kishigirim qurylys jáne jóndeý jumystary 9 tamyzǵa deıin tolyq aıaqtalady. Buǵan deıin stadıonnyń jaryq júıesi jańartylyp, 50-den astam sham aýystyryldy. Qazirgi tańda sahnanyń tehnıkalyq jabdyqtalýy men qaýipsizdik talaptaryna sáıkestigi tekserilýde. Syrtqy dárethanalar jańartyldy, qorshaýlar qalpyna keltirilip, irgeles aýmaq abattandyryldy.
Qazirgi ýaqytta sahnanyń tehnıkalyq jabdyqtalýy men qaýipsizdik talaptaryna sáıkestigi tekserilýde.
«Bul konsert – Almaty úshin asa mańyzdy oqıǵa. Onyń qalaı ótetini qalanyń halyqaralyq bedeline tikeleı áser etedi, sondyqtan usaq-túıek jaıttardy da eskerý qajet. Mundaı sharalar Almatyǵa degen qyzyǵýshylyqty arttyryp, týrıserdi tartý úshin mańyzdy», – dep atap ótti Almaty qalasy ákiminiń orynbasary Azamat Qaldybekov.
Konsert kezinde qoǵamdyq qaýipsizdikti qamtamasyz etý úshin 2960 qyzmetker jumyldyrylady: onyń ishinde 2240 polısıa qyzmetkeri, 600 áskerı qyzmetker, 120 jeke kúzet agenttigi ókilderi jáne 300 erikti bar.
Keshke keletin qonaqtardyń qaýipsizdigin qamtamasyz etý maqsatynda stadıonǵa kiretin 26 baqylaý beketiniń árqaısysynda metal detektorlar men 52 qol skanerleri jumys isteıtin bolady.
Stadıon aýmaǵy tórt negizgi fan-aımaqqa bólinedi, árqaısysyna eki-úsh myń adamnan artyq jiberilmeıdi. Osylaısha, kórermenderdiń qozǵalysyn baqylaý men tártipti saqtaý barynsha ońtaılandyryldy.
Qala ákimdigi tarapynan sanıtarlyq talaptar da basty nazarda. Stadıon janyna qosymsha 100-ge jýyq bıotýalet qoıylady, aýmaq birneshe kezeń boıynsha zararsyzdandyrylady. Tazalyqqa mán berý maqsatynda volonterler arasynda "Taza Qazaqstan" aksıasy aıasynda tazalyq sharalary júrgiziledi.
Oqıǵa ornynda jedel járdem men órt sóndirý qyzmetteriniń kólikteri kezekshilik etedi. Barlyq tótenshe jaǵdaılar qyzmetteri tolyqtaı daıyn. Sonymen qatar, evakýasıalyq jospar men dybystyq habarlaý júıeleri tekserýden ótkizildi.
Kelýshilerge qolaıly bolýy úshin 50 qoǵamdyq avtobýs arnaıy marshrýttarmen qyzmet kórsetedi. Qozǵalys baǵyttary Abaı, Sátbaev, Baıtursynov kósheleri boıymen belgilenip, navıgasıa men LED-ekrandar arqyly kórsetiletin bolady.
Almaty Djennıfer Lopestiń konsertine tek sahna jaǵynan ǵana emes, qaýipsizdik pen uıymdastyrý jaǵynan da álemdik standarttarǵa saı daıyn.