Stomatologtar kóp balaly 40 ana men múmkindigi shekteýli 20 balany qabyldady.
Almatydaǵy kóp balaly qyryq ana №5 qalalyq klınıkalyq aýrýhanada tisin tegin emdeý múmkindigine ıe boldy. Qaıyrymdylyq aksıasy Astana kúnine oraılastyryldy, dep habarlaıdy Almaty-akshamy.kz.
Naýqastardy 5-shi aýrýhananyń úzdik stomatologtary qabyldady. Medeý aýdany «Baqytty otbasy» áleýmettik ortalyǵynyń basshysy Tolqyn Sametovanyń aıtýynsha, halyqtyń áleýmettik osal tobynan shyqqan kóptegen áıelder stomatologıalyq qyzmet kórsetý ortalyǵyna muqtaj.
«Kóp balaly áıelder tis emdeýdiń qymbat ekenin aıtady. Sol sebepti muqtaj jandarǵa kómektesýdi sheshtik. Bul sharaǵa Medeý aýdany ákimdigi, Nur Otan partıasynyń ujymy men emhana basshylyǵy qoldaý bildirdi. Olarǵa úlken alǵys bildiremiz. Búgin stomatologtar kóp balaly 40 ana men múmkindigi shekteýli 20 balany qabyldady. Bul áleýmettik jaýapkershiligi joǵary kásiporynnyń mysaly», – deıdi Tolqyn Sametova.
Aıta keterligi, «Baqytty otbasy» jobasy kóp balaly otbasylardyń balalary men ata-analaryna, sondaı-aq halyqtyń áleýmettik osal top ókilderine qyzmet kórsetedi.
Buǵan deıin Medeý aýdanynyń kóp balaly analary №5 QKA bas dárigeri Bolat Sadyqovpen kezdesip, onda halyqtyń áleýmettik osal toby úshin tegin stomatologıalyq qyzmet kórsetý máselelerin kótergen edi. Sóz sońynda emdelýge muqtaj analar men Medeý aýdany balalarynyń tizimin jasaý týraly sheshim qabyldandy.
Bul aksıa kóp balaly analar úshin tisin emdetýge oń yqpal etýde.
