Almatyda III Halyqaralyq Green Spaces Conference & Expo 2025 konferensıasy men kórmesi ótip jatyr. İs-sharaǵa mınıstrlikterdiń, ákimdikterdiń, máslıhattardyń ókilderi, sondaı-aq, otandyq jáne sheteldik sarapshylardan quralǵan 2 myńnan astam qatysýshy jınaldy.
Spıkerler arasynda Almaty ákiminiń orynbasary Almasqan Smatlaev, Almaty oblysynyń ákimi Marat Sultanǵazıev, sáýletshiler, ýrbanıster jáne tálimbaqtardyń basshylary bar.
Almasqan Smatlaevtyń aıtýynsha, Almaty eldegi eń jasyl qalalardyń biri mártebesin saqtap keledi.
«Jalpy 68 myń gektar aýmaqtyń 25 myń gektardan astamyn jasyl jelek alyp jatyr. Bir adamǵa shaqqanda kógaldandyrý deńgeıi 13 sharshy metrden asady. Biz bul kórsetkishti odan ári arttyrýǵa kúsh salyp otyrmyz», – dedi ol.
Ákimniń orynbasary Memleket basshysynyń tapsyrmasyn júzege asyrý barysyna da toqtaldy.
«2030 jylǵa deıin Almatyda 2,5 mln jasyl ekpe aǵash otyrǵyzý josparlanǵan. Ásirese, 4-6 metrlik iri aǵashtarǵa basymdyq beriledi. Olar tez jersinip qana qoımaı, qalaǵa birden sán beredi», – dedi Smatlaev.
Onyń aıtýynsha, bıyl kóktemde Almatyda 2 myńnan astam osyndaı aǵash otyrǵyzylǵan, al kúzde taǵy 13 myń aǵash egý kózdelip otyr. Bul kóshetterdiń barlyǵy Bas botanıkalyq baq pen Agrarlyq ýnıversıtet mamandarynyń keńesimen tańdalǵan.
2025 jyly qoǵamdyq keńistikterdi jańartý jospary bekitilip, onda sapaly túrde kógaldandyrýǵa basa nazar aýdarylǵan.
«Almaty ákimdigi endi sanǵa emes, sapaǵa mán bermek. Shahardyń jasyl qoryn saýyqtyrý baǵytynda aýqymdy is qolǵa alynady. Bul iske barshańyzdy jumyla atsalysýǵa shaqyramyz», – dedi Almasqan Smatlaev.
Halyqaralyq kórme 2 myń sharshy metr aýmaqta ótip jatyr. Onda abattandyrýdyń, tálimbaqtardyń jáne kógaldandyrýdyń zamanaýı tásilderi kórsetilip, Qazaqstan men shetelden kelgen ókilder bas qosty.