Almaty qalasy ákiminiń orynbasary Beıbit Shahanov Naýryzbaı aýdanyndaǵy salynyp jatqan áleýmettik nysandardyń jaı-kúıimen tanysyp qaıtty. Sapar barysynda mektep, balabaqsha men emhananyń qurylys barysyn kórip shyqty.
Quramys shaǵynaýdanynda ákimniń orynbasary «Bazis Construction» JSHS salǵan 1500 oryndyq jaıly mektepke bardy. Beıbit Shahanov Qurylys basqarmasyna mektepti Bilim basqarmasynyń ıelegine ótkizýdi jedeldetip, 15 qyrkúıekke deıin ınjenerlik jáne komýnıkasıalyq jelilerdi iske qosý jumystaryn tolyq aıaqtaýdy tapsyrdy.
Sondaı-aq, osy shaǵynaýdandaǵy aýysymyna 500 adam qabyldaıtyn emhananyń qurylysyn kórdi. Munda «MIR-A Construction» JSHS monolıtti jumystar júrgizip jatyr. Sapar barysynda ákimniń orynbasary jumysshylar sanyn arttyryp, qurylys-montaj jumystarynyń qarqynyn kúsheıtýdi mindettedi.
Buǵan qosa, Quramys pen Shuǵyla shaǵynaýdandarynda 320 oryndyq balabaqshalardyń, sondaı-aq Shuǵyladaǵy (Eńbek kóshesi) 340 oryndyq jataqhanasy bar mekteptiń qurylysyna basa nazar aýdaryldy. Qurylys kompanıalarynyń málimetinshe, nysandar shamamen 70-85% daıyn. Qurylys basqarmasyna jumys sapasyn baqylaýdy kúsheıtý tapsyryldy. «Astana-Stroıınvest» korporasıasyna qazan aıynyń basyna deıin balabaqshalardy, al aıdyń sońyna deıin mektepti tolyq aıaqtaý mindetteldi. Sonymen qatar, merdigerge jasyl jelek pen kógaldy kútip-baptaý úshin óz qarajaty esebinen qosymsha avtosýarý júıesin ornatý júkteldi.
«Balalar óziniń mektebine tezirek oralýy qajet. Sondaı-aq, aýmaqty abattandyrý jáne kógaldandyrýǵa erekshe mán berý kerek. Aǵash egip, balalarǵa yńǵaıly ári ásem aýla jasańyzdar», – dedi Beıbit Shahanov.
Balabaqshalardy aralaý barysynda ákimniń orynbasary balalarǵa jasalyp otyrǵan jaǵdaıǵa toqtalyp, olardyń qaýipsizdigi men jaılylyǵy basty nazarda bolýy kerektigin atap ótti.
Áleýmettik nysandardyń qurylysy qala ákimdiginiń únemi baqylaýynda. Bul jobalardyń ýaqytyly aıaqtalýy Naýryzbaı aýdany turǵyndaryn zamanaýı bilim berý jáne medısınalyq ınfraqurylymmen qamtamasyz etýde erekshe mańyzǵa ıe.