220 kásibı mamannan quralǵan komanda Almaty tórinde Djennıfer Lopestiń ǵalamat shoýyn jasap jatyr, dep habarlaıdy Aqshamnews.kz.
10 tamyzda Almaty álemdik pop-mýzykanyń ortalyǵyna aınalady. Qala stadıonynda ánshiniń 2025 jylǵy jazǵy Summer týry aıasynda aýqymdy konsert ótedi.
Alańda halyqaralyq standarttarǵa saı, kópdeńgeıli, aýqymdy sahna ornatylýda: tik munaralar, kóteriletin platformalar, asa dál jaryq jáne beıne júıesi. Qoıylymnyń ár elementi sekýnd saıyn eseptelip, minsiz jumys isteýi úshin ár elden jınalǵan bilikti mamandardyń úılesimdi eńbegimen jasalyp jatyr.
«Qaırat» FK oıyny aıaqtalǵan boıda stadıonǵa qazaqstandyq prokat kompanıalarynyń jabdyqtary tıelgen bes júk kóligi kirdi. Bar-joǵy úsh kún ishinde, táýlik boıy jumys isteı otyryp, 220-dan astam tehnıkalyq maman — montajshylar, ınjenerler, úılestirýshiler eńbek etip jatyr. Biz sahnany ornatýmen qatar, qaýipsizdik qyzmetkerlerine, eriktilerge, bılet satýshylarǵa nusqaýlyq ótkizip jatyrmyz. Bul aýqymy men oryndalý jyldamdyǵy jaǵynan komandalyq jeńis bolǵan joba. Tipti, álemdik týrdyń tehnıkalyq dırektory da bizdiń jumys yrǵaǵymyzǵa tańdanys bildirdi», — dedi First Media Group dırektory Álfıa Nurǵumarova.
Uıymdastyrýshylar qala qyzmetterimen birlese otyryp, qaýipsizdik pen logıstıkanyń negizgi qyrlaryn pysyqtap jatyr. Konsert kúni stadıon aımaqtarǵa naqty bólinedi: fan-aımaqtar, laýnj-aımaqtar, fýd-korttar, VIP jáne medıa aımaqtar. Qaýipsizdik pen jaılylyqty qamtamasyz etý úshin medısınalyq brıgadalar, tótenshe jaǵdaı qyzmetkerleri jáne órt sóndirý toptary kezekshilik atqarady. Kirý qaqpalaryna metaldetektorlar men qol skanerleri bar 26 baqylaý-ótkizý pýnkti ornatylady.
Barlyq yqtımal jaǵdaıǵa áreket etý senarıleri Tótenshe jaǵdaılar departamenti, jedel járdem, polısıa jáne ózge de qurylymdarmen tyǵyz úılestirýde pysyqtalyp jatyr. Árbir qonaqtyń ózin qaýipsiz sezinýi mańyzdy.
«Konsert bıletteri tolyq satylyp ketti. Olardy AQSH pen Japonıadan bastap, BAÁ men Kanadaǵa deıingi 35-ten astam eldiń kórermenderi jáne myńdaǵan qazaqstandyq satyp aldy. Mundaı halyqaralyq qyzyǵýshylyq konsertti týrızm men kreatıvti ekonomıkanyń qýatty draıverine aınaldyryp, Almatynyń aımaqtyń mádenı astanasy retindegi mártebesin nyǵaıtady. Bul jaı konsert emes, Qazaqstan úshin tarıhı sát tehnologıa, sheberlik pen energıanyń toǵysýy, ol qalanyń jylnamasyna altyn áriptermen jazylady», — dep sózin túıindedi Álfıa Nurǵumarova.