Almaty ákimi Darhan Satybaldy jasandy ıntellekt salasyndaǵy jetekshi qytaılyq iFLYTEK kompanıasynyń TMD elderine arnalǵan bas dırektory Han Mınsze myrzamen kezdesti, - dep habarlaıdy Aqshamnews.kz.
Kezdesý barysynda kompanıa ókilderi bilim salasyna arnalǵan tehnologıalyq sheshimderin tanystyrdy. Atap aıtqanda, «muǵalim – mashına – oqýshy» qaǵıdaty boıynsha jumys isteıtin vırtýaldy kómekshisi bar ınteraktıvti taqtalar men planshetter usynyldy. Mundaı sıfrlyq sheshimder oqytý úderisiniń tıimdiligin arttyrýǵa jáne oqýshylardyń oqý materıalyn meńgerý deńgeıin kúsheıtýge baǵyttalǵan.
Darhan Satybaldy bul baǵytty damytýǵa qyzyǵýshylyq bildirip, Qazaqstan Respýblıkasynyń Prezıdenti Qasym-Jomart Toqaev «Jasandy ıntellekt dáýirindegi Qazaqstan: ózekti mindetter jáne olardy sıfrlyq transformasıa arqyly sheshý» joldaýynda júktegen tapsyrmalar aıasynda bilim berý júıesin jańǵyrtý, adamı kapıtaldy damytý jáne bilikti kadrlar daıarlaý boıynsha belsendi jumys júrgizilip jatqanyn atap ótti. Sondaı-aq ol mektepke deıingi tárbıe men jalpy bilim berýden bastap joǵary oqý oryndary men ǵylymǵa deıin barlyq deńgeıde bilim sapasy men qoljetimdiligin arttyrý basymdyq ekenin aıtty.
Kezdesý qorytyndysy boıynsha Almaty ákimi iFLYTEK kompanıasynyń tájirıbesin jan-jaqty zerdeleýdi jáne usynylǵan sheshimderdi otandyq bilim berý standarttaryna beıimdeý múmkindigin qarastyrýdy tapsyrdy.