İshki ister mınıstrligi Qazaqstan azamattaryna qatysty zańsyz áreketterdiń jolyn kesý maqsatynda transulttyq qylmystyq toptardy halyqaralyq deńgeıde anyqtaý jumystaryn jalǵastyryp keledi, - dep habarlaıdy Aqshamnews.kz.
- 21 qazan kúni issapar barysynda Qazaqstan Respýblıkasy İİM Kıberqylmysqa qarsy is-qımyl departamentiniń qyzmetkerleri Reseı Federasıasynyń İİM Kıberpolısıa basqarmasymen birlesip, uzaq merzimdi jedel sharalar nátıjesinde Reseıdiń úsh óńirinde ınternet-alaıaqtardyń jolyn kesti. Olar Qazaqstan men TMD elderiniń azamattaryna qatysty zańǵa qaıshy áreketter jasaý úshin sim-kartalardy jetkizý jáne qosý arnasyn uıymdastyrǵan.
Arnaıy operasıa nátıjesinde kúdiktilerden 11 sim-box qurylǵysy, 3 noýtbýk, 31 uıaly telefon, sondaı-aq 19 myńnan astam qazaqstandyq jáne eýropalyq sim-kartalar tárkilendi. Tárkilengen noýtbýkterde 2023 jyldyń basynan bastap iske qosylǵan túrli baılanys operatorlarynyń abonenttik nómirleri týraly málimetter saqtalǵan "log-faıldar" tabyldy.
Bul nómirler alaıaqtyq qońyraýlar jasaý úshin paıdalanylǵan. Zańsyz áreketteri úshin Reseı Federasıasynyń tórt azamaty ustaldy. Barlyq mán-jaılardy anyqtaýǵa baǵyttalǵan tergeý jáne jedel-izdestirý sharalary jalǵasýda.
Birlesken áreketter sim-kartalardy jetkizý arnasyn jáne transulttyq uıymdasqan toptyń qyzmetin toqtatýǵa, azamattardy alaıaqtyq sqemalarǵa tartýdyń aldyn alýǵa, sondaı-aq halyqaralyq kıberqylmysqa eleýli soqqy berýge múmkindik berdi, - dedi QR İİM kıberqylmysqa qarsy is-qımyl departamenti bastyǵynyń orynbasary Aslan Óskembaev.