Qala basshysy problemalyq nysandardyń ýaqytyly ári sapaly aıaqtalýyn qamtamasyz etýdi mindettedi
Almaty ákimi Darhan Satybaldy Túrksib aýdanyndaǵy áleýmettik jáne komýnaldyq ınfraqurylym nysandaryn aralap shyqty, dep habarlaıdy aqshamnews.kz.
«Nurshashqan» shaǵyn aýdanynda qala ákimi aýyzsý, káriz jáne elektr jelileri boıynsha ınfraqurylymdyq jobalardyń júzege asyrylý barysymen, sondaı-aq «Halyq qatysatyn búdjet» baǵdarlamasy aıasynda abattandyrylyp jatqan «Nyǵmet» skverindegi jumystarmen tanysty.
Turǵyndar jaryqtyń jıi sónip qalýy men sýdyń turaqsyz berilýi máselesin kóterdi.
«Podstansıany sheńberli júıege qospaıynsha, qýat kózi turaqty bolmaıdy, bul týraly maǵan endi ǵana baıandalyp otyr. Munda stansıa salyndy, endi jelini qosý qajet. Halyq turatyn aýmaq arqyly ótkizýge turǵyndar qarsy bolǵan, biraq qazir kelisimge kelgen», - dep túsindirdi Darhan Satybaldy.
Sýmen jabdyqtaý boıynsha jobadaǵy kemshilikterge baılanysty qala ákimi qazirgi merdigermen jumysty aıaqtaýdy jáne merzim buzylǵan jaǵdaıda basqa uıymdy tartýdy tapsyrdy.
«Bul jobany jylytý maýsymy bastalǵanǵa deıin aıaqtaý qajet», - dep atap ótti qala basshysy.
Energetıka jáne sýmen jabdyqtaý basqarmasynyń ókili «Tuzdybastaý» shaǵyn aýdanynda osy aıdyń sońyna deıin sheńberli júıe tolyq aıaqtalatynyn habarlady.
Turǵyndar shaǵynaýdandaǵy ózekti máselelerge mán berip, tolyqqandy aqparat bergeni úshin ákimge alǵys bildirdi.
Sapar barysynda Ogarev kóshesinde salynyp jatqan balabaqsha men Shyǵarmashylyqty damytý ortalyǵynyń jobalary qaraldy. Sanıtarlyq-qorǵaý aımaǵy shegerimderin eskere otyryp, nysandardyń jobalyq parametrlerin qalalyq qurylys talaptary men qadaǵalaýshy organdardyń qorytyndylaryna sáıkes qaıta qaraý tapsyryldy.
«Álmerek» jáne «Maıak» shaǵyn aýdandarynda ákim sý, káriz jelilerin tartý jáne elektr jelilerin jańartý jobalarymen tanysty. Sonymen qatar, otbasylyq-dárigerlik ambýlatorıa men balabaqshanyń qurylys ýchaskeleri de tekserildi.
Aýdannyń kólik baılanysyn jaqsartýǵa mańyzdy áser beretin Kishi Almaty ózeni arqyly ótetin kópir ótkeliniń aıaqtalýyna erekshe nazar aýdaryldy.
Qala basshysy aýdan ákimdigi ókilderine: «Ózendegi jaǵdaı qandaı? Kóktemgi tasqyn kezinde jaǵdaı qalaı bolady?» - degen naqty suraqtardy qoıdy.
Túrksib aýdanynyń ákimi Baqytjan Aqjarov ózen arnasy ırek bolǵanymen, tasqyn sýǵa qatysty esh qıyndyq joq ekenin málimdedi.
Osy rette qala ákimi jaǵalaý aýmaǵyn abattandyrýdyń mańyzdylyǵyn atap ótti. Talqylaý kezinde ózen arnasyn bekitý jumystary týraly da aıtyldy.
Bul jóninde ákim:
«Men óz basym jasyl jelek pen qoǵamdyq keńistikterdiń kóbirek bolǵanyn qoldaımyn. Bul halyqtyń mádenıetin ózgertedi dep senemin», - dedi Darhan Satybaldy.
Maılın kóshesindegi «Avıator» dene shynyqtyrý-saýyqtyrý kesheniniń aýmaǵynda ákim bolashaq sport kesheniniń jobasymen tanysty. Onda baseın men ámbebap sport zaly qarastyrylǵan. Joba boıynsha bul keshen táýligine 1300-ge deıin kelýshini qabyldaı alady.
Qonaev atyndaǵy josparly kvartalda ákim «Nurly jer» baǵdarlamasy aıasynda salynyp jatqan 260 oryndyq balabaqsha men turǵyn úılerdiń qurylys barysymen tanysty. Injenerlik jelilerge qosylý jáne abattandyrý máselelerine erekshe kóńil bólindi.
«Nysandar sapaly ári merziminde aıaqtalýy tıis. Jumys kestesin buzatyn merdigerler jaýapkershilikke tartylady.», - dedi qala basshysy.
Sondaı-aq Hmelnıskıı kóshesin Talǵar tas jolyna deıin jalǵastyrý jobasy da qaraldy. Bul joba qalanyń shyǵys bóligindegi kólik júktemesin azaıtyp, qoljetimdilikti arttyrýǵa baǵyttalǵan.
«Bul - qozǵalystyń mańyzdy kúretamyry. Jobanyń júzege asyrylýy sozbalańǵa salynbaýy kerek. Merzim men sapa – meniń jeke baqylaýymda», - dep atap ótti ákim.
Kezdesý barysynda Qonaev PK aýmaǵyndaǵy bes úıdiń turǵyndary áli kúnge deıin kárizden shyqqan jaǵymsyz ıistiń baryn aıtyp, úılerinde gazdyń joqtyǵyn da kóterdi. Bul máseleler boıynsha qala ákimi tıisti oryndarǵa sebebin anyqtap, máseleni sheshýdi tapsyrdy.
Avtobýs baǵyttarynyń jetispeýshiligi týraly suraqqa Almaty ákimi qoǵamdyq kólik júıesi týraly tolyq málimet berip, turǵyndar usynysy jańa marshrýttyq syzbany ázirleý kezinde eskeriletinin aıtty.
Jeke turǵyn úı sektorynyń bir turǵyny joldardyń toǵanyn alǵa tartty. Darhan Satybaldy bul másele jaýapsyz merdigerlerdiń áreketimen baılanysty ekenin jetkizdi.
«Men ózim aýlamen júrip óttim, turǵyndardyń nege tap bolatynyn kózimmen kórdim. Mundaı máseleler nazardan tys qalmaýy tıis», - dedi ákim.
Kezdesý sońynda qala basshysy merdiger uıymdarǵa baqylaýdyń kúsheıtiletinin jáne turǵyndar kótergen árbir másele belgilengen merzimde sheshilýi tıis ekenin atap ótti.
Sapar qorytyndysynda Darhan Satybaldy birqatar naqty tapsyrmalar berip, keshigýlerdi boldyrmaý, merdigerlerge baqylaýdy kúsheıtý jáne barlyq jobalardy belgilengen merzimde aıaqtaýdy mindettedi. Sonymen qatar, qalada jaıly ómir súrý ortasyn qalyptastyrý ár jobanyń jergilikti deńgeıde sapaly júzege asýynan bastalatynyn eske saldy.