Birinshi nysan – Almaty jol-qurylys kompanıasy (AJQK). Munda asfált, kespe tas jáne jıektas óndiriledi. Bir aýysymda zaýyt 8 640 metr jol jáne magıstral jıektastaryn, 15 840 metr baq jıektastaryn, sondaı-aq 1 800 sharshy metrden astam kespe tas shyǵarady. Asfált óndirý qýattylyǵy – saǵatyna 980 tonna.
Kompanıanyń óz avtoparki bar: asfált tósegishter, taptaǵyshtar, ekskavatorlar jáne basqa da arnaıy tehnıkamen tolyq qamtylǵan. Bul jol qurylysynyń tolyq sıklin oryndaýǵa múmkindik beredi.
Kelesi nysan – Concrete Products zaýyty. Munda temirbeton qurylymdary, qasbettik panelder jáne kóriktendirý elementteri shyǵarylady. Kásiporynnyń jyldyq óndiristik qýaty 450 myń sharshy metr ónimge jetedi.
Sondaı-aq, qala basshysy ARIBA jıhaz fabrıkasyna bardy. Munda 140-tan astam qyzmetker eńbek etedi, kásiporynnyń jumsaq jıhaz ónimderi halyqaralyq kórmelerde birneshe ret jeńimpaz atanǵan.
Darhan Satybaldy jergilikti óndiristi qoldaýdyń mańyzdylyǵyn atap ótti:
«Óz óndirisimizdi damytyp, ónim sapasyna jáne “Almatyda jasalǵan” brendine basa mán berý qajet. Qala eń aldymen ózimizdiń kásiporyndardy qoldap, almatylyq ónimdi satyp alýǵa basymdyq berýi kerek», – dedi ákim.
Jumys sapary Seıfýllın dańǵyly men Jansúgirov kóshesiniń qıylysynda ornalasqan jańartylǵan aýmaqta aıaqtaldy. Nysan qala kúnine oraı ashylǵan. Munda keń kólemde kógaldandyrý júrgizilip, sáýlettik jaryqtandyrý, beınebaqylaý kameralary jáne balalar men múmkindigi shekteýli azamattarǵa arnalǵan ınklúzıvti elementter ornatylǵan.
Qala basshysy Almatyny kóriktendirý kezinde biryńǵaı sáýlettik stıl men qalalyq kodty saqtaý qajettigin atap ótti. Bul árbir jańa nysannyń megapolıs kelbetine úılesimdi enýine múmkindik beredi.
Ónerkásipti damytý men qalalyq ortany jaqsartý – Almaty ákimdiginiń basym baǵyttarynyń biri. Bul bastamalar ekonomıkanyń ósýine, jańa jumys oryndarynyń ashylýyna jáne turǵyndardyń ómir sapasyn arttyrýǵa yqpal etedi.