Almaty qalasynyń ákimi Darhan Satybaldy Jetisý aýdanyndaǵy «Dragon City» turǵyn úı kesheniniń turǵyndarymen kezdesti. Kezdesý barysynda turǵyndar jerasty turaǵyn zańsyz qaıta satý, qazandyqtyń jumysy jáne jerasty úı-jaıynda transformatorly qosalqy stansıany ornalastyrý sıaqty birqatar ózekti máselelerdi kóterdi.
Turǵyndar bastapqy joba boıynsha páterler parkıngpen birge satylǵanyn aıtty. Keıinirek sharttar ózgerip, kólik oryndarynyń quny 3-ten 10 mıllıon teńgege deıin ósken, sodan keıin úı-jaılar tolyǵymen komersıaǵa aınalǵan. Turǵyndardyń pikirinshe, bul bastapqyda oılastyrylǵan syzba bolǵan.
Darhan Satybaldy jaýapty organdarǵa osyndaı sheshimderdiń qalaı qabyldanǵanyn, kim ruqsat berip, qujattarǵa kim qol qoıǵanyn anyqtaýdy tapsyrdy. Ol budan bylaı bul másele óziniń jeke baqylaýynda bolatynyn aıtty.
«İs-qımyl algorıtmi Ekonomıkalyq tergeý departamentimen, prokýratýra, TJ jáne basqa da qyzmettermen birlesip ázirlenetin bolady. Qajet bolsa, transformatorlyq qosalqy stansıany aýystyramyz. Eń bastysy - keshenniń 2 jarym myńǵa jýyq turǵynnyń qaýipsizdigi men ómirine tónetin kez kelgen qaterdiń aldyn alý», - dedi ákim.
Qala basshysy jylytý maýsymynda qazandyqqa qyzmet kórsetýdi vedimistik baǵynysty uıym óz moınyna alatynyn atap ótti. Ol qysta úzilissiz jumys isteýine múmkindik beretinin, al kelesi jyly nysan búdjet esebinen jańǵyrtylatynyn aıtty.
Ákim transformatorly qosalqy stansıany jerasty úı-jaıyna ornalastyrýǵa qatysty aldymen qaýipsizdik sharalaryn pysyqtaýdy tapsyrdy.
Turǵyndar abattandyrý máselelerin de kóterdi. Ákimniń tapsyrmasy boıynsha aýdanda jol belgileri, «kórinbeıtin polıseıler» jáne beınebaqylaý kamerasy ornatylady. Budan basqa, «Halyq qatysatyn búdjet» baǵdarlamasynyń tetigi arqyly balalar oıyn alańyn salý máselesi de qaralady.