Almaty ákimi Darhan Satybaldy Alataý aýdanyna jumys sapary barysynda Alǵabas shaǵynaýdanynyń turǵyndarymen kezdesti.
Qala basshysy kezdesýge kelgen barlyq turǵynnyń ótinishin tyńdady.
Shaǵynaýdan turǵyndary ortalyq káriz júıesine qosylý, jaryqtyń jıi sónýi, jol jóndeý jumystarynyń aıaqtalýy jáne oıyn alańdarynyń joqtyǵy týraly máselelerdi kóterdi.
Energetıka jáne sýmen jabdyqtaý basqarmasy basshysynyń mindetin atqarýshy Nurbaqyt Serikbaı baıandaǵandaı, shaǵynaýdanda 19,9 shaqyrym sý qubyry jáne 27,3 shaqyrym káriz jelilerin tartý aıaqtaldy.
Jobany júzege asyrý 584 jeke úıdi nemese 4 myńǵa jýyq adamdy ortalyq jelilermen qamtamasyz etýge múmkindik berdi. Káriz jelilerin tolyq iske qosý úshin basqarma sorǵy stansıasyn salyp jatyr. Nysan kelesi jyldyń basynda paıdalanýǵa berilmek.
Sondaı-aq, turǵyndardy elektr jaryǵymen turaqty qamtamasyz etý úshin 70 shaqyrym jeli salynyp, 31 transformator ornatyldy.
Qalanyń mobıldilik basqarmasynyń basshysy Saǵyndyq Telibaev búginde shaǵynaýdanda 31 shaqyrym jolǵa asfált tóselgenin jáne qalǵan 900 shaqyrym jolda tıisti jumystardyń júrgizilip jatqanyn aıtty.
«Asfálttyń joǵarǵy qabatyn tóseý jáne jol belgilerdi ornatý sıaqty barlyq jumys qyrkúıekke deıin aıaqtalýǵa tıis. Kelesi jyldyń basynda sorǵy stansıasynyń qurylysy aıaqtalǵan soń barlyq úı ortalyq káriz júıesine qosylady. Biz qazir qurylys merzimin hattamaǵa engizdik, onyń oryndalýyn jiti baqylaýyma alamyn», - dedi Darhan Satybaldy.
Buǵan qosa, qala basshysy Alataý aýdanynyń ákimi Talǵat Malybaevqa shaǵynaýdanda sanıtarlyq tazalyqty kúsheıtý, balalar alańdaryn salý múmkindigin qarastyrý jáne ınfraqurylymdyq nysandardyń belgilengen merzimde aıaqtalýyn qamtamasyz etýdi júktedi.