Almaty qalasy ákiminiń orynbasary Beıbit Shahanov qurylys normalary buzylyp salynǵan jáne úleskerlerdiń qarajatyn tartýǵa ruqsaty joq turǵyn úı keshenderinen baspana satyp alý máseleleri boıynsha azamattardy jeke qabyldady.
Kezdesý barysynda Beıbit Shahanov turǵyndardyń ótinishterin tyńdap, qalalyq basqarmalar men quqyq qorǵaý organdarynyń ókilderimen birge túsindirý jumystaryn júrgizdi.
Qala ákiminiń orynbasary turǵyn úı satyp alý kezinde qurylys salýshydan barlyq ruqsat qujattarynyń tolyq toptamasyn talap etý asa mańyzdy ekenin atap ótti. Onyń ishinde Qazaqstan turǵyn úı kompanıasynyń kepildigi nemese «Turǵyn úı qurylysyna úlestik qatysý týraly» zańǵa sáıkes úleskerlerdiń qarajatyn tartýǵa ákimdiktiń resmı ruqsaty bolýy qajet.
Sonymen qatar, ákimdik turaqty negizde satyp alýǵa usynylmaıtyn turǵyn úı keshenderiniń tizimin jarıalap otyratynyn aıtty jáne azamattardy jyljymaıtyn múlik alarda barynsha saq bolýǵa shaqyrdy.
Qujattardyń bar-joǵyn Almaty qalasy Qala qurylysyn baqylaý basqarmasynyń +7 705 89 66 000 baılanys nómiri arqyly tekserýge bolady.