Almaty ákimdigi qoǵamdyq kólikter jumysynyń júrý kestesinde nege keshigýler bolǵanyn túsindirdi, dep habarlaıdy almaty-akshamy.kz
«6 qazan kúni Almatyda aýa temperatýrasy tómendep, qar aralas jaýyn jaýdy. Osyǵan baılanysty qoǵamdyq kólikterdiń júrý kestesinde keshigýler men aralyq úzilister paıda boldy, josparly keıbir baǵyttar tek saǵat 8-ge taman qalpyna keltirildi», - dep habarlady Almaty qalalyq mobıldilik basqarmasynan.
Basqarma málimetinshe, sondaı-aq búgin qosalqy stansalardyń birinde (№16) elektr kabeli isten shyqty. Saldarynan Shalápın kóshesinen Saın jáne Momyshulyna deıin, Momyshuly boıymen Abaıǵa deıin 3-yqshamaýdannan Saın kóshesine deıin jáne Saın boıymen Jubanovtan Stýdent kóshesine deıin troleıbýs baǵyttarynyń qozǵalysy buzyldy.
«Marshrýttardyń tolyq toqtap qalýyn boldyrmaý úshin, josparlanǵan №5, 12, 6, 11 troleıbýstar sanyn qysqartý týraly sheshim qabyldandy. Qazirgi ýaqytta barlyq troleıbýstar 100 paıyz jolǵa shyqty», - dedi basqarmada.
Al tańerteńgi ýaqytta avtobýstar sanynyń 94%-ǵa deıin azaıyp ketýi aýa raıyna baılanysty boldy. Sebebi, tómen temperatýranyń áserinen dızel otyny qoıýlanyp ketken. Tasymaldaýshylar maýsymdyq otyndy jyldyq keste boıynsha 15 qazanǵa deıin jetkizýge tapsyrys bergen. «Basqarma men tasymaldaýshy kompanıa avtobýstardyń marshrýttarǵa josparly shyǵarylýyn qamtamasyz etý úshin keshendi sharalar qoldanyp jatyr», - delingen habarlamada.