Almaly aýdany Qala kúnin jańarǵan ári burynǵydan da jaıly keıipte qarsy aldy, dep habarlaıdy aqshamnews.kz
Sebebi qala eń áýeli aýladan bastalady. Bul bizdiń ómir súrip, demalatyn, kórshilermen aralasatyn ortamyz.
Bıyl aýdandaǵy aýlalar aıtarlyqtaı ózgerdi. «Halyq qatysatyn búdjet» baǵdarlamasy aıasynda jobalardyń basym bóligi aıaqtaldy: 23 aýla jóndelip, 4 aýla kógaldandyryldy, tek bir ǵana nysanda jumys jalǵasyp jatyr. Al aǵymdaǵy jóndeý aıasynda josparlanǵan 33 jobanyń 25-i tolyq bitip, qalǵan 8 aýlada qurylys jumystary júrip jatyr.
Turǵyndar úshin bul kóbirek jasyl jelek, jańa balalar jáne sport alańdary, demalys pen kórshi-qolańmen júzdesýge yńǵaıly aımaqtar degen sóz. Árbir kórkeıtilgen aýla – Almatynyń zamanaýı ári kórikti qalaǵa aınalýyndaǵy qadam. Munda kósheler men alańdardyń kelbeti ǵana emes, adamdardyń óz úıinde qalaı sezinetini de mańyzdy.
Qala kúnine oraı Almaly aýdany turǵyndarǵa jańarǵan aýlalardy tartý etip otyr. Bul Almatynyń shynymen de adamdar úshin jaıly qala bolýyna baǵyttalǵan ıgi is.