ABG kompanıasy elimizdegi iri avtojol jobalaryn júzege asyrýǵa nıet bildirdi
QR Premer-Mınıstri Álıhan Smaıylov Al Badie Group for Trading and Investment (ABG) kompanıasynyń bas dırektory Haled Mohamed Al Badımen kezdesý ótkizdi, onda avtomobıl joldaryn salý salasyndaǵy yntymaqtastyq máseleleri qaraldy, dep habarlaıdy Almaty-akshamy.kz primeminister.kz-ke silteme jasap.
ABG kompanıasy elimizdegi iri avtojol jobalaryn, sonyń ishinde respýblıkalyq mańyzy bar joldardy jańǵyrtýdy qarjylandyryp, olardy júzege asyrýǵa nıet bildirdi.
Premer-Mınıstr búginde arab ınvestorlarynyń Qazaqstanǵa degen qyzyǵýshylyǵynyń artyp kele jatqanyn atap ótti. Úkimet basshysynyń aıtýynsha, buǵan taıaýda Memleket basshysynyń BAÁ-ge sapary yqpal etti.
«Biz sheteldik seriktesterdiń árbir usynysyn joǵary baǵalaımyz, sondaı-aq ınvestısıalardy qorǵaý jáne qolaıly iskerlik ahýaldy qamtamasyz etý boıynsha barlyq mindettemelerimizdi oryndaımyz», — dedi Álıhan Smaıylov.
Óz kezeginde Haled Mohammed Al Abadı ABG kompanıasynyń álemniń kóptegen elderinde iri ınfraqurylymdyq jobalardy tabysty iske asyrýda tájirıbesi bar ekenin aıtty.
«Eki el basshylarynyń belsendi ózara is-qımyly, sondaı-aq ekijaqty qarym-qatynastardyń qarqyndy damýy bizdiń Qazaqstanǵa kelýimizge sebep boldy. Biz avtojol jobalaryn iske asyrýdy ınvestısıalaýǵa múddelimiz, sondyqtan Qazaqstan Úkimetimen tyǵyz yntymaqtastyqta jumys istegimiz keledi», — dedi Haled Mohamed Al Badı.
Kezdesý qorytyndysy boıynsha Premer-Mınıstr kompanıanyń usynystaryn tıisti memlekettik organdardyń muqıat zerdelep, pysyqtaıtynyn aıtty.